Isilumkiso semozulu embi eMpuma Koloni
Izanusi zezulu zilumkisa ngemozulu embi elindeleke eMpuma Koloni namanye amaphondo kule veki.
Image: Freepik
Inkonzo yeMozulu yoMzantsi Afrika (SAWS) ilumkise ngemozulu eshushu neendudumo kumaphondo ahlukeneyo, kuquka neMpuma Koloni kule veki.
Eli phondo belijongene nemozulu embi kwiveki ephelileyo, nto leyo eshiye abanye abantu bengenamakhaya kwiindawo ezichaphazeleke kakhulu, nekukhokelele ekutshatyalalisweni kweziseko zophuhliso, apho abantu abahlanu babhengezwe njengabaswelekileyo ukuza kuthi ga ngoku.
iSAWS ithi iindudumo ezinkulu zinokulindeleka eMpuma Koloni, kunye namaphondo afana naKwaZulu-Natal, eMntla Koloni, eFreyistata naseMntla Ntshona. Isilumkiso senqanaba lesibini sikhutshwe ukuze kulumkiswe abantu ngezikhukhula ezinokwenzeka namatye amancinci omkhenkce asenokuna.
Kuthiwa iMpuma Koloni iza kuphinda ibenemozulu eshushu kakhulu nolophu. Izanusi zezulu zikwaqikelela izandyondyo zemvula nomoya obhudla ngamandla.
UMasipala weSithili saseAlfred Nzo ubongoza abahlali ukuba bahlale bekhuselekile kule veki.
"Kucelwa ukuba uluntu luqaphele ezindleleni njengoko oku kungenza iindlela zibemtyibilizi okungabangela iingozi ngenxa yeemvula ezinetha kakhulu zikwakhatshwa yimimoya evuthuza ngamandla nesichotho. Kungabakho nophazamiseko lombane ngexesha lezi mvula," utshilo uMasipala kwingxelo.
Lo Masipala ukwacebise abahlali ukuba babekude neentambo zombane ngexesha lemozulu embi, balumkele ukushiya izitovu zombane zibasiwe. "Nokuba umbane awukho, qinisekisa ukuba amakhandlela abasiweyo akwizikhuseli zawo," ucebise watsho uMasipala.
UMasipala wesithili saseAlfred Nzo uthe abo bathe bachaphazeleka yintlekele ngexesha lezi mvula bancede batsalele ku039 254 0748.
Ukuza kuthi ga ngoku, bahlanu abantu ababhubhileyo ngenxa yale mozulu imbi abasuka kuMasipala wesithili saseO.R. Tambo, uMasipala waseKing Sabata Dalindyebo noMasipala waseNyandeni.
Izanusi zezulu zikwaqinisekise ukuba zibeke esweni isichotho esibizwa ngokuba yiGezani, ngoku esikummandla osemazantsi ntshona wolwandlekazi lwaseIndiya empuma yeMadagascar.
Okwangoku, akukho nto ibonisa ukuba kukho umngcipheko othe ngqo kuMzantsi Afrika.
Uluntu nabasemagunyeni abafanelekileyo bayacelwa ukuba balandele izilumkiso zemozulu ezisemthethweni neengxelo ezivela kwimithombo ethembekileyo.