Amadoda amabini agwetyelwe ukudlwengula inkwenkwe eGqeberha

Amadoda amabini, uLisakhanya Tony (18) noWinston Smith (32), bafunyenwe benetyala lokudlwengula inkwenkwe eneminyaka elishumi elinanye ubudala kwaye bagwetywa eGqeberha kutshanje.

Esi sigqibo senziwe yiNkundla yengingqi yaseGqeberha ngoLwesithathu wale veki kwaye esi senzo singenalusini kule nkwenkwe senzeke kwinyanga yoMsintsi ka2023.

Isithethi samapolisa, uKapteni uSandra Janse Van Rensburg, uqinisekise ukuba esi siganeko senzeke ngomhla wesithathu kweyoMsintsi 2023 malunga nentsimbi yesibhozo ebusuku eKuyga, eGreenbushes.

"Ixhoba lalikunye nabahlobo balo behleli ecaleni komlilo ematyholweni akufutshane. Aba bagwetyiweyo babini basondela kweli qela, banqunga ixhoba, baza balidlwengula. Ityala lokudlwengula labikwa kwisikhululo samapolisa saseKabega Park," utshilo uJanse Van Rensburg.

Ngosuku olulandelayo, ngomhla wesine kweyoMsintsi 2023, ingxelo yamapolisa ithi amalungu ecandelo leFamily Violence, Child Protection and Sexual Offences (FCS) eGqeberha ababambe bobabini abatyholwa. Bagcinwe entolongweni ixesha lonke belixoxwa eli tyala.

NgoMvulo wale veki, bobabini abatyholwa bafunyenwe benetyala lokudlwengula. NgoLwesithathu, inkundla igwebe uTony iminyaka elishumi elinesihlanu entolongweni, ngelixa uSmith egwetywe ubomi entolongweni kwaye wabhengezwa njengongafanelekanga ukuba nompu, utshilo uJanse Van Rensburg.

UKhomishinala wesithili saseNelson Mandela Bay, uMajor General Vuyisile Ncata, uncome amagosa aphandayo, uSajini Babalwa Ramba noConstable Xolisa Khedama becandelo leFCS,ngokuzinikela kwabo nobungcali babo ekuqinisekiseni ubulungisa kwixhoba.

"Oku kufunyaniswa kwabo ukuba banetyala nokugwetywa kwabo ngempumelelo kubonisa ukuzinikela kwamapolisa ekukhuseleni amalungu asesichengeni kuluntu lwethu.

"Ezi zigwebo zithumela umyalezo ocacileyo nongagungqiyo wokuba ulwaphulomthetho olubi kangaka luya kujongwana nalo ngamandla onke omthetho," utshilo uMajor General Ncata.

Amapolisa akhuthaza uluntu ukuba lubike izehlo zobundlobongela obusekelwe kwisini (GBV) nokuxhatshazwa kwabantwana. Amapolisa aqinisekisa uluntu ukuba amacandelo akhethekileyo ahlala ezinikele kuphando olunzulu nokufuna ubulungisa.