OweMarch and March ujongene namatyala ngenxa yoqhankqalazo kwizikolo zaseThekwini

Inkokeli yombutho woluntu iMarch and March, uJacinta Ngobese Zuma, utyholwa ngodushe lwasesidlangalaleni olunxulumene noqhankqalazo olwenzeke kwisikolo samabanga aphantsi saseAddington eDurban.

Ukususela oko kwavulwa izikolo, lo mbutho, kunye nabalandeli beqela leMK Party neOperation Dudula babambe uqhankqalazo kwesi sikolo.

Babefuna indawo yabantwana abangabhaliswanga abazalwa eMzantsi Afrika, besithi isikolo sinabemi bamanye amazwe abaninzi. Kodwa iSebe leMfundo laseKZN lithi zonke iinkqubo zokubhalisa abantwana esikolweni ezifanelekileyo zilandelwe. Lithi linani elincinci labafundi, abangabemi baseMzantsi Afrika nabangaphandle abangenawo amaxwebhu afunekayo.

NgoLwesibini kusasa uNgobese Zuma uzinikele emapoliseni. Igqwetha lakhe, uXolani Zuma, liqinisekisile ukuba kuvulwe ityala lokuphembelela ubundlobongela esidlangalaleni.

“Singaqinisekisa ukuba kukho idokethi evuliweyo, kwaye iMarch and March, iOperation Dudula, noMkhonto WeSizwe Party zibekwe amatyala ngokusesikweni. Sikulungele ukuya enkundleni size sifake isicelo sebheyile. IGunyabantu lezoTshutshiso (NPA) ngoku liza kugqiba ukuba ityala lifanelekile na ukutshutshiswa okanye akunjalo, kwaye siza kubona apho,” utshilo uZuma. 

Umbutho weMarch and March uthi kuyadanisa ukuba urhulumente ukhethe ukumangalela umsunguli wawo ngokuphembelela ubundlobongela endaweni yokujongana nemiba ekhoyo.