Abane bagqamise iMpuma Koloni kwabagqwese kuzwelonke
Ukusuka ekhohlo ukuya ekunene: uSesona Masingili, uMaria Freercks, uNgazibini Unathi Ntungwa noEmma Booyens.
Image: Simon Majadibodu / Soqhayisa Senior Secondary School / Clarendon High School / Facebook
Ngabafundi baseCofimvaba, eMonti naseGqeberha abaphakamise iflegi yaseMpuma Koloni phakathi kwabafundi abagqwesileyo kuzwelonke.
Aba bafundi bane babephakathi kwabangamashumi amane abaphumelele emagqabini kuzwelonke kwizifundo ezahlukeneyo. UNgazibini Unathi Ntungwa, ophuma kwisikolo Isikhoba Nombewu Technical Secondary School eCofimvaba uwongwe kwindawo yesithathu kwiTechnical Sciences.
UEmma Booyens wesikolo iClarendon High School eMonti ufumene indawo yesithathu kwiPhysical Sciences. Ngelixa uMaria Freercks wesikolo iCollegiate Girls’ High School eGqeberha efumene indawo yesibini kuzo zonke izifundo zakhe, yena uSesona Masingili wesikolo iSoqhayisa Senior Secondary School eMotherwell ufumene indawo yesithathu kwiAccounting.
Bawongwe ngoMvulo eGoli xa uMphathiswa weSebe leMfundo esiSiseko, uSiviwe Gwarube, ebhengeza iziphumo zematriki zika2025.
INkulumbuso yaseMpuma Koloni uOscar Mabuyane uvuyisene nabafundi abaphumeleleyo.
Kuthiwa urhulumente wephondo laseMpuma Koloni, ngeSebe leMfundo, uza kuqhuba uhlalutyo lweziphumo ukuze achonge iindawo ezithile ezifuna ukungenelelwa, kuquka iindlela abafundi abaqhube ngayo kwizifundo, iindlela ezisetyenziswa kwizithili, neemfuno zenkxaso zabafundi.
"Ngokusekelwe kolu hlalutyo, iinkqubo zokujongana nemfundo, amanyathelo okuphucula uphuhliso lwabafundisintsapho, nokubeka esweni okuqinisiweyo nenkxaso yezikolo ziya kuphunyezwa," itshilo ingxelo.