Iziphumo zematriki zabangamashumi amane abakope iimviwo ziza kugcinwa
Iziphumo zematriki zabafundi abangamashumi amane abakope iimviwo zabo zokugqibela kunyaka ophelileyo ziza kugcinwa.
Image: Armand Hough/Independent Newspapers
UMphathiswa weMfundo esiSiseko uSiviwe Gwarube uthi iziphumo zabafundi abangamashumi amane bematriki ababhaqwa bekopa ngexesha leemviwo zabo zokugqibela kunyaka ophelileyo, ziza kubanjwa de kuphume iziphumo zetyala.
UGwarube ebethetha neentatheli ngoLwesihlanu emva kwemini malunga nokukhutshwa kwengxelo yexeshana yeqela likazwelonke eliphandayo, iNational Investigative Task Team (NITT), eliphande ngokusasazwa kwamaphepha eemviwo zeNSC.
Olu lwaphulomthetho lujoliswe kubafundi abamalunga namashumi amane abavela kwizikolo ezisixhenxe kummandla waseTshwane abafunyenwe befumene amaphepha eemviwo zematriki zesiNgesi, izibalo nePhysical Science.
UGwarube uthe abafundi abafunyenwe benetyala iziphumo zabo kwizifundo ezifanelekileyo ziza kurhoxiswa.
"Iziphumo zabafundi abangamashumi amane ziya kuxoxwa ngokusebenzisa inkqubo ezimeleyo. Apho umfundi eza kufunyaniswa enetyala ligosa elizimeleyo eliphetheyo, olu phando, kunye neengcebiso, luza kuya kwiExamination Irregularity Committee kwaye emva koko iye kwiNational Examination Irregularity Committee," utshilo uGwarube.
Uthe uMalusi uza kuba ngumlamli wokugqibela. Abafundi abafunyenwe benetyala banokuthi iziphumo zabo kwizifundo ezifanelekileyo zirhoxiswe futhi banokugwetywa ngakumbi. Isohlwayo siquka ukuthintela ukubhala iimviwo zeNSC ukuya kuthi ga kwiiseshoni ezintathu zoviwo, utshilo uGwarube.
Kusenjalo, iziphumo zematriki zonyaka ka2025 ziza kubhengezwa ngoMvulo, umhla weshumi elinesibini kweyoMqungu.