ISebe lezoPhuhliso loLuntu lixhalabile ngokungakhathalelwa kwabantwana ngexesha leziyunguma
ISebe lezoPhuhliso loLuntu laseMpuma Koloni lixhalabile linani lamatyala okungahoywa kwabantwana ngexesha leeholide.
Image: Bongani Mbatha
ISebe lezoPhuhliso loLuntu laseMpuma Koloni lixhalabile ngenani lamatyala okungahoywa nokuxhatshazwa kwabantwana axeliweyo kweli phondo.
Ukuza kuthi ga ngoku, iSebe libikelwe malunga namatyala angamashumi amathandathu okungahoywa kwabantwana ngexesha leziyunguma.
Ethetha ngale ngxaki, uMlawuli woNxibelelwano kweli Sebe, uMzukisi Solani, uthi kuyaxhalabisa xa kukho nantoni na efuna ukugrogrisa ubukho nentlalontle yabantwana.
“Sele kukho umthetho obanzi ogweba abazali abaphula umthetho ngokusebenzisa uMthetho waBantwana 38 ka2005, lo mthetho unika amandla amalungelo athile abantwana njengoko kuchaziwe kumgaqosiseko.
“Ikwamisela imigaqo yokhathalelo nokukhusela abantwana, ide ichaze noxanduva lomzali. Ngoko ke kukwaphula umthetho ukungabahoyi nokulahla abantwana,” utshilo uSolani.
Uqhube wathi endaweni yokungahoyi nokulahla abantwana, kukho ezinye iindlela zokunyamekela abantwana.
“Oko kuquka ukukhuliswa komntwana kumaziko okhathalelo lolutsha, kukwakho nenkqubo yokuthathwa komntwana,” utshilo.
Uthe iSebe lineendlela zokuthintela nokungenelela kwangethuba apho lityala khona izixhobo kwiinkqubo zokukhulisa abantwana.
“Kukwakho nezibonelelo ezahlukeneyo ezenzelwe ukunciphisa umthwalo kubazali abajongene nobunzima,” utshilo uSolani.