Iindaba

Iimveliso zobisi olungumgubo lweentsana zirhoxisiwe

Cwayita Nondula|Published

Imveliso yobisi lwabantwana irhoxisiwe emva kokuba iqulethe isithako esiyingozi empilweni.

Image: iStock

IKomishoni kaZwelonke yabaThengi ibhengeze ukubuyiswa kwezinye iimveliso zomgubo wobisi iNestle NAN Special Pro HA yeentsana ezithengiswa kuMzantsi Afrika wonke.

Le mveliso yenziwe kwinyanga yeSilimela ka2025 kwaye yasasazwa kulo lonke elaseMzantsi Afrika, eNamibia naseSwatini.

Imveliso echaphazelekayo yile ikhankanywe ngasentla, iNAN Special Pro HA 800g enenombolo yemveliso ethi 51660742F3.

Le Komishoni ibongoze abathengi abathenge le mveliso echaphazelekayo ukuba bayibuyisele kwivenkile abayithenge kuyo ukuze babuyiselwe imali yabo.

"Ukurhoxiswa kwemveliso kulandela ukuchongwa kokuba kukho iCereulide, ityhefu eveliswa yiBacillus cereus, ebangela inkxalabo ngokhuseleko lokutya," itshilo iKomishoni ngoLwesithathu.

Akukho zigulo ziqinisekisiweyo ngokunxulumene noku. Ngaphandle kwamazwe aseAfrika, oku kuye kwachaphazela namazwe aseYurophu, eMzantsi nakuMntla Merika naseAsia.