Iindaba

UMothibi utyunjwe njengoMlawuli omtsha wezoTshutshiso loLuntu kuzwelonke

Cwayita Nondula|Published

UMongameli uCyril Ramaphosa unyule uAdv. Jan Lekgoa (Andy) Mothibi njengoMlawuli omtsha welizwe wezoTshutshiso loLuntu (NDPP).

Image: Umfanekiso ogciniweyo

UMongameli uCyril Ramaphosa unyule uAdvocate Jan Lekgoa (Andy) Mothibi njengoMlawuli omtsha wezoTshutshiso loLuntu kuzwelonke (NDPP), ethatha indawo ka-Advocate Shamila Batohi oxesha lakhe lifikelela esiphelweni.

UAdvocate Mothibi uza kuqala kwesi sikhundla kwinyanga ezayo ngomhla wokuqala kweyoMdumba 2026.

UMongameli Ramaphosa uye waseka igqiza labacebisi ukuba likhethe umgqatswa ofanelekileyo kwesi sikhundla. Igqiza belikhokelwa nguMphathiswa wezoBulungisa noPhuhliso loMgaqosiseko, uMmamoloko Kubayi, nabanye abantu abathandathu abakhulu kwicandelo lezomthetho.

Igqiza layiqukumbela inkqubo laza langenisa ingxelo yalo kuMongameli ngomhla weshumi elinesibini (12) kweyoMnga 2025. Kwingxelo yalo, igqiza lacebisa uMongameli ukuba akukho namnye kwabagqatswa ekwenziwe udliwanondlebe nabo abafaneleke isikhundla seNDPP.

UAdv. Mothibi okwangoku uyiNtloko yeCandelo eliKhethekileyo loPhando (SIU), waqala umsebenzi wakhe njengomtshutshisi woluntu kwiiNkundla zooMantyi zaseGoli naseSoweto kunye neeNkundla zeNgingqi.

Kuthiwa wayekwanguMantyi kwiiNkundla zooMantyi zaseGoli naseSoweto. UAdv. Mothibi ebekhe wasebenza kwizikhundla ezahlukeneyo zecandelo likarhulumente nelabucala, kuquka nakwaSARS njengeNtloko yeeNkonzo zezoMthetho neNtloko yoLawulo.

UMongameli Ramaphosa umbulele uAdvocate Shamila Batohi ngomsebenzi negalelo lakhe kwi-arhente yelizwe yezotshutshiso kwaye unqwenelele impumelelo uAdv. Batohi kwiinzame zakhe.