Ityala lokubulawa kukaDJ Warras lihlehliselwe iveki ezayo
UVictor Majola otyholwa ngokubulala uDJ Warras ngethuba evela enkundleni.
Image: Itumeleng English / Independent Newspapers
Ityala lokubulawa kukaWarrick “DJ Warras” Stock lihlehliselwe iveki ezayo ngoLwesibini umhla weshumi elinesithathu (13) kweyoMqungu 2026, kwiNkundla kaMantyi yaseGoli.
Umtyholwa, uVictor Majola, 44, uvele enkundleni namhlanje ngoLwesibini. Ityala lihlehlisiwe ukuze akwazi ukufaka isicelo sebheyile ngokusesikweni.
Ngexesha lokuvela kukaMajola enkundleni, ubuzwe ngumantyi ukuba ulufumene na unyango, oku kungenxa yokuba ukugqibela kwakhe ukuvela enkundleni kunyaka ophelileyo, wathi wenzakele waza wacela ukubona ugqirha.
Umtyholwa uVictor Majola enkundleni.
Image: Itumeleng English / Independent Newspapers
Uxelele inkundla ukuba ubonwe ngugqirha ngoMvulo.
UMajola utyholwa ngokudubula nokubulala uDJ Warras ngaphandle kwesakhiwo iZambezi House kumbindi weGoli kunyaka ophelileyo ngomhla weshumi elinesithandathu (16) kweyoMnga 2025.
Inkampani kaDJ Warras yabucala yokhuseleko, i-Imperium Ops International, yafumana ikhontrakthi yokubonelela ngeenkonzo kwesi sakhiwo.
Kwiiveki ezingaphambi kokubhubha kwakhe, uStock kuthiwa wenza imiyalelo emininzi yokhuseleko emva kokufumana izigrogriso ezinxulumene nomsebenzi wakhe.
UMajola uza kuvela kwakhona kwiveki ezayo ngoLwesibini ukuza kufaka isicelo sebheyile.