Amakhwenkwe alishumi ahlangulwe kwaze kwabanjwa ummi wangaphandle
Ummi welizwe langaphandle oneminyaka engamashumi amane anesixhenxe ubudala ubanjwe emva kokubhaqwa kwamakhwenkwe alishumi ebenganxibanga ngokupheleleyo.
Image: Umfanekiso ogciniweyo
Ummi wangaphandle, 47, ubanjwe emva kokubhaqwa kwamakhwenkwe alishumi ebenganxibanga iimpahla ngokupheleleyo eMulbarton eGoli ngoLwesibini.
UColonel Katlego Mogale, isithethi sooKhetshe ephondweni, uthi amalungu esebe lamaPolisa kuMasipala waseGoli bebejikeleza ngethuba bexelelwa ngemeko engaqhelekanga eyenzeka kwisitalato iBroad Street.
“Baxelelwe ngeqela labafana abasibhozo ababenganxibanga iimpahla ngokupheleleyo behamba ngeenyawo. Emva kophando olongezelelekileyo, amapolisa afumanise ukuba aba bafana bangabantu bangaphandle abangakwaziyo ukuthetha isiNgesi,” utshilo uMogale.
“Amapolisa axelelwe ukuba kukho amakhwenkwe amabini asele ethathiwe ngemoto yohlobo lweVW Jetta enombala oluhlaza. Emva koko isithuthi siye samiswa ecaleni kwendlela, kodwa umqhubi wabaleka, nto leyo eyabangela ukuba aleqwe,” wongeze watsho uMogale.
Ekugqibeleni umqhubi wabanjwa kumbindi weGoli kwisitalato iCommissioner Street, emva kokubanjwa, amapolisa akwazile ukuhlangula amanye amakhwenkwe.
UColonel Mogale uqinisekisile ukuba umrhanelwa ujongene namatyala amakhulu, kuquka ukuba kweli lizwe ngokungekho mthethweni nokurhanelwa ngokurhweba ngabantu. Kulindeleke ukuba avele phambi kwenkundla kamantyi yaseBooysens ngoLwesine.