Iindaba

IStar Bakeries iqinisekisa ukufikelela kwamanzi okuphuculweyo eLesseyton

Cwayita Nondula|Published

Ukusuka ekhohlo ukuya ekunene: UBuseka Adonis oyiNgcali yoPhuhliso loLuntu yeNgingqi ePremier FMCG, uMorapeli Selemeng onguMlawuli wezoBudlelwane namahlakani kwiSebe lasePhondweni lezaManzi noGutyulo, uAnnette Holtzhausen onguMphathi weDepo Star Bakeries kuKomani kwakunye noNoncedo September-Caba onguSekela Sodolophu woMasipala weSithili saseChris Hani.

Image: Uthunyelwe

Uluntu lwelali yaseLesseyton kuKomani lufumene isixhobo sokumpompa amanzi (borehole) esisebenzisa umbane osuka elangeni, enjongo yaso ibonelela abahlali ngamanzi akhuselekileyo nathembekileyo nanjengoko kukho ukunqongophala kwamanzi kule ngingqi.

Inkampani yakwaStar Bakeries inikele ngesi sixhobo samanzi kutshanje nesiza kubonelela uluntu ngeelitha ezingamawaka angamashumi amabini (20 000) zamanzi.

Umsitho wokunikezelwa kwale mpahla ubuzinyaswe ngabantu abafana noSodolophu womasipala wesithili saseChris Hani, uLusanda Sizani, kwakunye nabanye abameli bakamasipala nabasebenzi benkampani iStar Bakeries ephantsi kwayo ebizwa ngokuba yiPremier FMCG.

UCeba weWadi kwilali yaseLesseyton, uNoxolo Solani, uthe iphulo elifana neli libuyisa isidima. "Isixhobo samanzi siya kwenza umahluko omkhulu kakhulu kubomi babahlali bethu. Ukufikelela kwamanzi kudala iyintsokolo yemihla ngemihla eLesseyton iminyaka, kwaye le nkxaso iya kunceda iintsapho, ngakumbi abantu abadala, abasetyhini nabantwana, ukuze bakhe amanzi ngokukhuselekileyo kwaye ngaphandle kokudinwa," utshilo uSolani.

Umphathi wentengiso kwaStar Bakeries, uStephanie Hoy, uthe kwaStar Bakeries bayayazi ukuba amanzi ayimfuneko esisiseko somntu, kwaye banolwazi olunzulu ngemingeni yemihla ngemihla uluntu oluninzi olujongene nayo ekufikeleleni kwamanzi.

Abahlali belali yaseLesseyton bebhiyozela ukufumana iikiriva ezibonelelwe yiStar Bakeries.

Image: Uthunyelwe

"Esi sixhobo samanzi yindlela yethu yokubuyisela ebantwini abaxhasa nabathanda inkampani yethu, siqinisekisa ukuba iintsapho ziyakwazi ukufikelela ngendlela ethembekileyo kwesi sibonelelo sibalulekileyo.

"Iikiriva zilulwandiso oluncinci kodwa olunentsingiselo yalo mnikelo, lunika abahlali indlela esebenzayo yokuqokelela nokuthutha amanzi ngesidima nangendlela engaxakekisiyo," utshilo uHoy.

KuMzantsi Afrika uphela angaphezulu kwesigidi (1.56 million) amakhaya angekafikeleli kumanzi aphuma ngeempompo, iindawo zasemaphandleni ezifana neLesseyton zichatshazelwa ngokugqithisileyo ngamanzi aphelayo, ukusilela kweziseko ezingundoqo nokuphazamiseka kunikezelo lwamanzi ixesha elide. Kwiintsapho ezininzi, ukukha amanzi kudinga kuhanjwe imigama emide kwaye amaxesha amaninzi kuthwele iimbhombhozi ezinzima – itshilo ingxelo yeStar Bakeries.

UPortia Makhanya ongumlawuli omkhulu kwiSebe lezaManzi noGutyulo kwiPhondo uthe iSebe liyalamkela eli phulo elibonisa ixabiso lentsebenziswano yecandelo labucala ekuphuculeni ukufikeleleka kwamanzi kwiindawo ezisemaphandleni.

"Amaphulo afana nala awapheleli nje ekuxhaseni iinzame zikarhulumente koko ajongana neemfuno zabahlali abajongene nemingeni yobonelelo," utshilo uMakhanya.