Umalusi wanelisekile ngamanyathelo athatyathwe yiDBE kwityala lokuthutyeleziswa kwamaphepha eemviwo
Umalusi uthi wanelisekile ngamanyathelo athatyathwe liSebe leMfundo esiSiseko kwityala lokuthutyeleziswa kwamaphepha eemviwo.
Image: Umfanekiso ogciniweyo
Ibhunga eliqinisekisa umgangatho weemviwo, Umalusi, uthi lanelisekile ngamanyathelo athatyathwe liSebe leMfundo esiSiseko (DBE) ukujongana nokuthutyeleziswa kwamaphepha eemviwo kulandela iingxelo zobugwenxa kumaphepha ezifundo ezithathu abhalwe ngabafundi bakaGrade 12.
Isithethi sakwaMalusi, uBiki Lepota, uthe bayiqaphele ngenkxalabo enkulu imiba ethe yaphakanyiswa ngethuba lendibano noonondaba ebibanjwe namhlanje (uLwesine) nguMphathiswa weMfundo esiSiseko, uSiviwe Gwarube, malunga nezityholo ezixeliweyo zobugwenxa ezibandakanya amaphepha eemviwo zezifundo ezithathu – iMathematics, Physical Sciences ne-English Home Language.
"Umalusi unqwenela ukwazisa uluntu ukuba ufumene ingxelo yokuqala ngoLwesithathu, umhla we10 kweyoMnga evela kwiSebe ngemiba echazwe nguMphathiswa," utshilo uLepota.
ULepota uqhube wathi emva kokuyifunda le ngxelo, Umalusi wanelisekile ngamanyathelo athatyathiweyo yiDBE ukuza kuthi ga ngoku, kuquka nokuxela ityala emapoliseni.
"Umalusi uyakholwa ngumsebenzi wophando oqhubekayo ojolise ekujongeni ubungakanani bomonakalo.
"Kulindeleke ukuba iSebe linikezele ngeziphumo zalo ezimayelana nalo mba ukuze ziqwalaselwe yiKomiti eLawulayo yeBhunga likaMalusi ngexesha leentlanganiso ezivuma iziphumo eziya kubanjwa ngomhla wesithandathu ukuya kowesibhozo kweyoMqungu ka2026," utshilo uLepota.
UMphathiswa wemfundo esisiseko uSiviwe Gwarube ethetha noonondaba malunga nomba wamaphepha eemviwo aye athutyeleziswa.
Image: Murray Swart
ULepota ukwaqinisekise ukuba baza kukhusela ukuzimela kophando kwaye abazukuphinda bathethe ngalo mba de kube ngumhla wesithoba kweyoMqungu ka2026 xa Umalusi eza kube esenza isibhengezo malunga nokuziphatha nolawulo lweemviwo zikazwelonke zokuphela konyaka ka2025.
UGwarube ukuqinisekisile ngoLwesine ukuba umsebenzi weSebe uyabandakanyeka kwesi siganeko. Uthe kuthutyeleziswe amaphepha eemviwo asixhenxe, athe afunyanwa ngabafundi kwizikolo ezisixhenxe zasePitoli phambi kweemviwo ebezicwangcisiwe.
Uphando olunzulu lubonise ukuba amaphepha eemviwo aliqela, kuquka iEnglish Home Language P1, 2, no3, Mathematics P1 no2, kwakunye nePhysical Science P1 no2, aye abiwa, utshilo uGwarube.
La maphepha aye ahanjiswa ngesixhobo sokugcina, iUSB ngamanye, utshilo okaGwarube.