UMabuyane neMelika baqinise ityathanga lentsebenziswano kule veki
URhulumente weMpuma Koloni wamkele amagosa kaRhulumente waseMelika engxoxweni yokuqinisa intsebenziswano.
Image: Office of the Premier
Nangona kukho ukugxeleshana ngezikhondo zamehlo phakathi koMzantsi Afrika neMelika (USA) - kodwa zikhona izinto ezinika ithemba. Oku kucace ngethuba iMpuma Koloni iqinisa ityathanga lentsebenziswano neMelika.
Ekuqaleni kwale veki, iNkulubaphathiswa yephondo uMnu. Lubabalo Oscar Mabuyane ibambe intlanganiso noAllison Areias oligosa likaRhulumente waseMelika. Injongo yentlanganiso phakathi kwephondo neMelika ibikukuqinisa iindlela zokusebenzisana, ngakumbi kwicala loqoqosho oludinga ukufunqulwa.
"Ingxoxo yethu igxile ekuqiniseni iinkqubo zethu zempilo, ukukhusela imisebenzi echatshazelwe yirhafu yorhwebo (trade tariffs) nezinye izinto ezinokwandisa amathuba otyalomali. Sithethile nangendlela esingathubeleza ngayo kokwenzeka ehlabathini okungayinzuzo macala onke," utshilo uMabuyane.
UMzantsi Afrika uphakathi kwamazwe awagxizwa ngerhafu ephezulu yorhwebo yiMelika. UMongameli Cyril Ramaphosa unethuba elide ezama ukungciba iintanda nokuthotywa kwerhafu ephezulu - kodwa akakaphumuleli kwezo nzame zakhe.
IMpuma Koloni iye yaphambili kwezona ndawo eziqhokrwe kakubi yirhafu ephezulu ngoba ivelisa iimoto neziqhamo ezithengiswa kwiimalike zaseMelika. Nangona inani leemoto ezithunyelwa eMelika lehlile kakhulu - kodwa iindaba ezimnandi zithi irhafu yorhwebo isusiwe kwiziqhamo zaseMzantsi Afrika.
Lo nto ithetha ukuthi iMpuma Koloni iza kukwazi ukuthumela iziqhamo kwakhona ikhusele nemisebenzi yabantu abasebenza ezifama. Ingxaki isahleli ezimotweni ngoba uMercedes-Benz uvelisa iimoto ezikhethekileyo eMonti azithumele eMelika - apho ebesenza khona ingeniso.
Yonke lo nto imoshakele ngoba uDonald Trump akafuni ukusebenzisana noMzantsi Afrika kakuhle. Usoloko elilisela ngobuxoki obuthi uRhulumente waseMzantsi Afrika ubulala amaBhulu futhi bathathelwa umhlaba wabo.
Oku wakuthatha ebantwini abathile abamhlophe abamxelela ubuxoki kuba bengathandi umthetho ojongene nokubuyiswa komhlaba ngendlela esemthethweni epasiswe kunyaka ophelileyo. Ngoku uMzantsi Afrika uzama ukukhangela amazwe ongarhwebelana nawo noxa iMelika iseyindawo ebalulekileyo.