Amapolisa abambe abarhanelwa abangaphezu kwe16 000 kwilizwe liphela
Amapolisa abambe amawakawaka abarhanelwa phambi kwexesha leziyunguma.
Image: Umfanekiso ogciniweyo
Amapolisa afumene impumelelo kwiphulo lawo elibizwa iSafer Festive Season Operation elikhokelele ekubanjweni kwabarhanelwa abangaphaya kwamawaka alishumi elinesithandathu (16 066) kwilizwe liphela kwiintsuku nje ezintandathu.
Eli phulo, neliqhutywe phakathi kwe17 kunye ne23 kweyeNkanga 2025, liqhutywa kunye neOperation Shanela II ukuqinisekisa ukhuseleko phambi kwexesha leziyunguma.
Ngokutsho kweNkonzo yamaPolisa aseMzantsi Afrika (SAPS), kwiveki enye, bangaphezu kwewaka (1870) abarhanelwa ababefunwa abafunyenwe baza babanjelwa izenzo zolwaphulomthetho, eziquka ukubulala, ukudlwengula, ukuphanga iimoto, ukuqhekeza izindlu namashishini kunye nokuthubelezisa iziyobisi.
Bangaphaya kwekhulu (143) abarhanelwa ababanjiweyo ngetyala lokubulala, iMpuma Koloni ikwindawo yesithathu ngabarhanelwa abangamashumi amabini anesihlanu (25) ababanjiweyo. Ilandela iphondo laseGauteng elilelona nani liphezulu elizweni labarhanelwa abangamashumi amathathu anesibhozo (38) ababanjiweyo ze iKwaZulu-Natal iphume kwindawo yesibini ngamashumi amabini anesithandathu (26) ababanjiweyo.
Bangaphaya kwekhulu (178) abarhanelwa ababanjelwe ukudlwengula, uninzi lwabarhanelwa lubanjwe KwaZulu-Natal (39), kulandele iMpuma Koloni (25).
Ngeli phulo amapolisa abambe abanye abarhanelwa ababini eVaal Plaza eGauteng, abayanyaniswa nokuphanga kuxhotyiwe ivenkile yobucwebe kudederhu lweevenkile eGqeberha ngomhla we18 kweyeNkanga 2025.
Ngexesha lokubanjwa, kwabakho ukudubulana emva kokuba omnye wabarhanelwa ekhombe amapolisa ngompu. Bobabini abarhanelwa bafumana umonzakalo kwaye babanjwa kwindawo yexhwayelo. Amapolisa athimbe imipu emibini yohlobo lwe9mm, iAK-47 eneembumbulu kunye nobucwebe ekukholelwa ukuba bubiwe ngethuba kuphangwa kutshanje.
EMpuma Koloni ngethuba leli phulo, amapolisa abambe imoto yohlobo lweOpel Astra ngakuN2 ngaseJeffreys Bay ze abamba abarhanelwa abathathu ngokwenza iyelenqe lokuzingela ngokungekho mthethweni imbaza (abalone). Amapolisa athimbe iiglasi zamehlo zokuntywila ezilishumi elinesixhenxe (17), iitotshi ezintlanu, iibhutsi zokuntywila ezilishumi elinesixhenxe (17), izixhobo ezifakwa enyaweni zokuntywila ezilishumi elinesixhenxe (17), iibhegi ezilishumi elinesine (14), iiplastiki zenkunkuma ezilishumi elinesine (14), izixhobo zokususa izinto ezilishumi elinesixhenxe (17) kwakunye nesithuthi ukuze ziphandwe zonke ezi zinto.