URamaphosa uncoma impumelelo yengqungquthela yeG20
UMongameli uCyril Ramaphosa uyincomile impumelelo yendibano yokuqala yeG20 ebibanjelwe kwilizwekazi iAfrika njengoko uMzantsi Afrika ububambe lo mcimbi kule mpelaveki idlulileyo.
Image: GCIS
Njengoko ingqungquthela yeenkokeli zeG20 ifikelele esiphelweni ngeCawe kwimpelaveki edlulileyo eGoli, uMongameli Cyril Ramaphosa uncome impumelelo yayo yomanyano ngenjongo enye.
URamaphosa uthi ngokudibana ngexesha lemingeni emandla, amazwe akwiG20 abonakalise isakhono sawo sokudibana ngelinge lehlabathi elingcono.
YiMelika kuphela engumququzeleli olandelayo weG20, engakwazanga ukuza eMzantsi Afrika. UMongameli waseMelika, uDonald Trump, utyhola uMzantsi Afrika ngokubulala amaBhulu nokuthatha umhlaba wawo wongeza ngelithi eli lizwe alifanelanga ukubamba kwiG20.
Njengengqungquthela yeG20 yokuqala ebanjelwe eAfrika, uMongameli Cyril Ramaphosa, uthe iingxoxo ezithathe unyaka wonke kwiindibano ezingaphezu kwekhulu (130) kumaphondo awohlukeneyo zifezekise injongo yazo yokubeka ilizwekazi leAfrika kunye nophuhliso leGlobal South kumbindi weengxoxo zengqungquthela yeG20.
"Le ngqungquthela yenzeke ngexesha elibalulekileyo njengoko izicelo emhlabeni jikelele zikhula ngokuvakalayo zimemelela inkqubelaphambili kwiimfuno zexesha lethu, ukuphelisa kwazo zonke iintlobo zentlupheko, ukunciphisa ukungalingani phakathi kwamazwe, kunye nokuthatha amanyathelo angxamisekileyo alwa nokutshintsha kwemozulu," utshilo uRamaphosa.
Uthe ukuvumelana kwamalungu eG20 ngesibhengezo somxholo ngexesha lengqungquthela kubonisa ixabiso leG20 njengeqonga elinokuthi liququzelele isenzo esidibeneyo kwimiba echaphazelekayo ekwabelwana ngayo.
Uqhube wathi, "Ngaphezu koko, iqinisekisa ukuzibophelela kwethu ngokutsha kwintsebenziswano yamazwe amaninzi kunye nokuqonda kwethu ukuba iinjongo zethu ekwabelwana ngazo ziza kodlula iiyantlukwano zethu."
Njengokuba bekungekho mntu omele iMelika eza kongamela iG20 kunyaka ozayo, uMzantsi Afrika uceba ukudlulisa iintamboo zolawulo zeG20 kwigosa laseMelika kwi-Ofisi yeSebe lezoBudlelwane baMazwe ngaMazwe kule veki.