IXESHA LEZIYUNGUMA | IMpuma Koloni iza kufumana amapolisa (686) amatsha
Iphondo leMpuma Koloni liza kufumana ngaphaya kwamakhulu amathandathu amapolisa amatsha aza kuncedisa ngelixesha leeholide.
Image: Phill Magakoe
IMpuma Koloni iza kufumana amapolisa amatsha angaphaya kwamakhulu amathandathu (686) asandula ukungeniswa kwiNkonzo yesiPolisa yoMzantsi Afrika. La mapolisa, aphuma kumaziko ohlukeneyo oqeqesho lwamapolisa, aza kunyusa amanani amapolisa ngeli xesha leziyunguma kweli phondo.
IGraaff Reinet SAPS Academy ibikuphela kweziko lamapolisa eMpuma Koloni ebelibambe umsitho ngaxeshanye namanye amaziko amane elizweni awamkele amapolisa amatsha kwiNkonzo yesiPolisa yoMzantsi Afrika (SAPS) ngoLwesihlanu umhla wama21 kweyeNkanga 2025, kutsho isithethi samapolisa ephondweni uWarrant Officer Majola Nkohli.
Kuthiwa amaziko amahlanu ewonke oqeqesho lwamapolisa, iTshwane (Gauteng), Oudtshoorn (eNtshona Koloni), iPhillippi (eNtshona Koloni), Bishop Lavis (eNtshona Koloni) neRhafu (eMpuma Koloni) abe nomsitho wokwamkela ngokusesikweni la mapolisa matsha. Iziko ngalinye kula libe negalelo kwinani lamapolisa amatsha aza kuthunyelwa eMpuma Koloni kanye ngexesha elixakekileyo leziyunguma.
Awasuka kwiGraaff-Reinet Academy, angaphaya kwamakhulu amathathu (339) amapolisa aqeqeshwayo agqibe ngempumelelo isiqinisekiso okanye isatifikethi seOccupational Certificate for Non-Commissioned Police Official phantsi kweQuality Council for Trades and Occupations (QCTO).
La mapolisa ayinxalenye yeqela labaqeqeshwa abangaphezulu kwamawaka amathathu (3558), abathe bangeniswa kwiSAPS njengamalungu apheleleyo.
UMkomishinala wamaPolisa kwiPhondo loMntla Koloni, uLieutenant General Koliswa Otola, obeqhuba umsitho kwiziko loqeqesho lwamapolisa eRhafu ngethuba esenza intetho yakhe, uthe: "Le ayisiyompahla nje oyinxibayo. Luphawu lwegunya, ewe, kodwa okona kubaluleke ngakumbi, luphawu lwenkonzo, lwemfezeko, nokuzinikela okungcwele kubantu baseMzantsi Afrika. iSAPS inithembile ngekamva layo. Abantu baseMzantsi Afrika bathembele kuni ngokhuseleko lwabo. Ningabaphoxi."
Eli linani lamapolisa amkelweyo kwiziko ngalinye kunye nenani elongeza emapoliseni azakuthi abekwe ngelixesha leziyunguma eMpuma Koloni:
1) Tshwane - 2036 (IMpuma Koloni iza kufumana amapolisa angaphaya kwamashumi amane [49])
2) Oudtshoorn - 445 (IMpuma Koloni iza kufumana amapolisa angaphaya kwamakhulu amane [403])
3) Phillippi - 423 (IMpuma Koloni iza kufumana amapolisa angaphaya kwamashumi amane [41])
4) Bishop Lavis - 315 (IMpuma Koloni iza kufumana amapolisa angaphaya kwamashumi amahlanu [59])
5) Graaff-Reinet - 339 (IMpuma Koloni iza kufumana amapolisa angaphaya kwekhulu [134])