Icandelo lezophapho laseMzantsi Afrika likulungele ukwamkela iinkokeli zehlabathi, utsho uCreecy

UMphathiswa wezoThutho uBarbara Creecy uthe icandelo lezophapho loMzantsi Afrika lixhotyiswe ngokupheleleyo kwaye likulungele ukwamkela iindwendwe zehlabathi eziza kuzimasa ingqungquthela yeenkokeli zeG20 kule mpelaveki.

UCreecy ebethetha noonondaba kwisikhululo seenqwelomoya iOR Tambo International Airport, eGoli, apho ebenikezela ngengxelo yobume malunga neziseko zezikhululo zeenqwelomoya zelizwe kwakunye nemeko yokulungela ingqungquthela yeG20 eGoli kule mpelaveki.

UCreecy uthi onke amalungiselelo abalulekileyo agqityiwe. "Yinyhweba yam ukuqinisekisa ukuba iindawo zokungena zoMzantsi Afrika zikulungele ukusingatha ingqungquthela yeenkokeli zeG20. Icandelo lethu lezophapho liwagqibile onke amalungiselelo abalulekileyo okuhlangabezana nemigangatho engqingqwa elindelekileyo kulo msitho uyimbali," utshilo.

IO.R. Tambo International Airport, Waterkloof Air Force Base neLanseria Airport ziza kusebenza njengeendawo zokungena kwiinkokeli zehlabathi ekulindeleke ukuba ziqalise ukufika ngoLwesine.

Uye wathi iindawo zokungena zelizwe zifezekise zonke iimfuno zokhuseleko ezifunekayo ukulawula ukungena kwamagosa ehlabathi.

"Ndicinga ukuba kubaluleke kakhulu, njengoko silungiselela zonke iinkokeli eziya kufika ngomso, ukuba sicacise ukuba silindele ukuba nombane osebenzayo nozinzileyo apha eO.R. Tambo International Airport.

"Eyona ndawo yethu esifumana umbane kuyo kulapha kuMasipala oMbhaxa waseKurhuleni, kodwa ukuba umbane umkile eO.R. Tambo International Airport, sinazo iijenereyitha zokuncedisa eziya kuthatha imizuzwana embalwa ukusebenza. Iijenereyitha ziya kubonelela ngombane ongaphazamisekiyo, ziqinisekisa ukuba imisebenzi ebalulekileyo yesikhululo seenqwelomoya iyaqhubeka ngaphandle kwengxaki," utshilo uMphathiswa.

Kuthiwa kuye kongezwa abasebenzi abaqhele ukusebenza ngexesha leeholide ukuqinisekisa ukusebenza ngaphandle kwengxaki ngeli xesha.