UGqirha Thandi Mgwebi uchongwe njengeNgqonyela yaseWSU

UGqirha Thandi Mgwebi uchongwe njengeNgqonyela yeYunivesithi iWalter Sisulu (WSU) kwaye uza kungena kwesi sikhundla ekuqaleni konyaka ozayo ngomhla wokuqala kweyoMqungu ka2026.

INational Research Foundation (NRF) ivuyisane noGqirha Mgwebi. "UGqirha Mgwebi unexesha elide esebenzisana neNRF, esebenza kwizikhundla eziphezulu zolawulo eziquka uMlawuli weHuman Capital Development.Ukwakhokele intsebenziswano namaziko afana neFulbright, iBritish Council, kunye neNewton Fund," itshilo iNRF.

I-NRF ithe amandla kaGqirha Mgwebi axhomekeke kubunkokeli obuchubekileyo nobunenkuthazo, ukuqinisa intsebenziswano, kunye nokuqokelela izixhobo zokusebenza. "Oku kubandakanya ukuphuhliswa kweenkqubo nezicwangciso ezibandakanya ulawulo kunye namaqela okunika iingcebiso anabantu abahlukeneyo, kunye nokuseka nokukhokela intsebenziswano yamacandelo amaninzi kunye nothungelwano," itshilo.

UMlawuli weNRF, uGqirha Fulufhelo Nelwamondo, uthe: "Sinebhongo kakhulu ngoGqirha Mgwebi nanjengoko ebuyela kwiyunivesithi ebefunda kuyo, eWSU, nalapho uhambo lwakhe lwezifundo luqale khona ngoko yayisaziwa njengeYunivesithi yaseTranskei. Simnqwenelela okuhle kodwa kwesi sikhundla sitsha kwaye sijonge phambili ekuqiniseni intsebenziswano yethu neWSU phantsi kobunkokeli bakhe."

UGqirha Mgwebi uza kungena ezihlangwini zikaNjingalwazi uRushiella Songca owaba yinkosikazi yokuqala kwesi sikhundla kule yunivesithi ngethuba echongwa ngo2021. Isivumelwano sengqesho sikaNjingalwazi Songca asizange sihlaziywe libhunga lale yunivesithi.

NgeyeThupha walo nyaka, usihlalo webhunga uTembeka Ngcukaitobi uthe waba nengxoxo noSongca malunga namalungiselelo enguqu kunye nasiphi na isikhundla anokuthi asithathe eyunivesithi emva kokugqiba ixesha lakhe.

"Ibhunga liza kuthi kamva libhengeze amalungiselelo okuphawula umbulelo walo ngendima edlalwe nguNjingalwazi uSongca neza kuqhubeka ukuyidlala kwinguquko yeziko," watsho uNgcukaitobi.

UMgwebi ebengomnye wabane abagqatswa kwesi sikhundla, abanye bebenguNjingalwazi Fulufhelo Nemavhola, uNjingalwazi Nosisi Feza noNjingalwazi Wezile Chitha.