Ilifu elimnyama eNMU

IYunivesithi yaseNelson Mandela (NMU) igutyungelwe lilifu elimnyama emva kokubhubha kwabafundi bayo abahlanu kwisithuba seeveki ezintathu.

Kutshanje, abafundi abathathu bonzakele ngosuku olunye.

"[UEnhle] Mboza ubhubhe kabuhlungu ngokuzibulala kwindawo ahlala kuyo yabafundi, ngoLwesihlanu, umhla wama31 kweyeDwarha. Kwangaloo mvakwemini, [uLihle] Shenxane no[Aphile] Jozana baya kuqubha eVictoria Bay, eGeorge, xa kusenzeka eli lishwa. Urhaxwe ngamanzi uShenxane, logama uJozana ebalekiselwe esibhedlele ekwimeko embi kodwa wabhubha izolo [ngoMvulo]," iqinisekise yatsho iYunivesithi kwingxelo.

Isithethi sale Yunivesithi, uZandile Ngwendu, wongeze ngelithi, kwiiveki ezimbini ezidlulileyo, uMinenhle Hlongwane ubhubhe emva kokuhlatywa ngethuba kuphangwa kwindawo yabucala ehlala abafundi eSummerstrand, eGqeberha.

"Kwisithuba esingangeveki nje edlulileyo, [uSikhunjulwe] Nkewana wafunyanwa engashukumi kwigumbi lakhe kwindawo ehlala abafundi eCentral, eGqeberha," utshilo uNgwendu.

IYunivesithi idlulise amazwi ovelwano kwiintsapho zabo, izihlobo kunye nabo basondeleyo kubo. "Sibuhlungu kunye nabo kwaye sibabeka kwimithandazo yethu ngeli xesha libuhlungu," itshilo iNgqonyela yale Yunivesithi uNjingalwazi Sibongile Muthwa.

Uqhubekile wathi, "Nathi siyayiqonda intlungu enzulu ethe yahlela abafundi bethu nabasebenzi. Iziko leYunivesithi iEmthonjeni Student Counselling Services libonelela ngenkxaso eqhubekayo ngokwasengqondweni kubo bonke abachatshazelweyo."

IYunivesithi ikhuphe amagama abafundi abahlanu ababhubhileyo. Nanga amagama abo:

UEnhle Mboza - umfundi owayefunda unyaka wesibini esenza iBachelor of Arts.

ULihle Shenxane - umfundi owayefunda iHigher Certificate Information Technology.

UAphile Jozana - umfundi owayefunda iHigher Certificate Business Studies.

UMinenhle Hlongwane - umfundi owayefunda unyaka wesibini esenza iBA Law.

USikhunjulwe Nkewana - umfundi owayefunda unyaka wesithathu esenza iDiploma in Logistics.