Unconyiwe ubhazabhaza webhulorho weR344-million owakhiwe nguSanral
UMphathiswa uBarbara Creecy noMphathiswa wephondo, uXolile Nqatha, bavule ibhulorho kuNdabakazi, eGcuwa, ngempelaveki.
Image: Sanral
Iqumrhu likaRhulumente, iSouth African National Roads Agency (SANRAL), livule ngokusesikweni ubhazabhaza webhulorho kwilali yakuNdabakazi, eGcuwa, ngempelaveki egqithileyo.
Umsitho ekuvulwe kuwo umsebenzi omhle owenziwe nguSANRAL ubuzinyaswe nguMphathiswa weZothutho kuzwelonke, uBarbara Creecy, owasephondweni uXolile Nqatha, amagosa aphezulu kwaSANRAL nezinye iindwendwe ezihloniphekileyo kuNdabakazi emini ngoMgqibelo odlulileyo.
Ibholorho entsha eyakhiwe ngemali engaphezulu kwamakhulu amathathu ezigidi zeerandi (R344-million) idibanise indlela enguN2 osuka eGcuwa oya eMonti - kodwa ephinda ingene kuR409 oya eNgqamakhwe naseTsomo.
Eminyakeni emithathu yolwakhiwo, yimisebenzi engaphezulu kwamakhulu amabini (227) futhi kuxhamle namashishini amancinci akumashumi amane anethoba (49) abaphuma kwiindawo eziphantsi koMnquma Local Municipality kwisixa semali esiyiR179-million.
UCreecy uwuqhwabele izandla umsebenzi owenziwe nguRhulumente kwenye yeendawo ezixakekileyo. "Lo msebenzi uguqule ubomi babantu bethu kule ndawo," utshilo uCreecy emva kokuvulwa kwebulorho ngokusesikweni.
"Abantu abaninzi abebengaphangeli bafumene ithuba lokusebenza nelokuncedisa neentsapho zabo," utshilo uMphathiswa echwayitile. Ukwakhiwa kwebhulorho kufike nokwakhiwa kwegaraji nendawo ekukhwelelwa kuyo iiteksi.
Naye uMphathiswa uNqatha uwuqhwabele izandla umsebenzi omhle owenziwe nguSANRAL watsho embongoza ukuba aqhubele phambili nokwakha ezinye iindlela eMpuma Koloni enenani eliphantsi leendlela ezinetha.
"Iindlela zethu ezinetha zimbalwa kakhulu (10%) kweli phondo. Sidinga utyalomali oluthe chatha ukuze kuphucuke iindlela kunyuke nokuseleko elakuthi licuthe iingozi," utshilo uNqatha.
Ukuphucuka kwendlela kuNdabakazi kuza kuphucula uqoqosho eGcuwa ngoba yindawo enamashishini aliqela asakhulayo. Idolophi yaseGcuwa yenye yeendawo ezisatsala nzima kwiimini zikaxakeka ngenxa yokuxinana kweemoto phakathi edolophini. Akukacaci ukuba iza kwakhiwa nini indlela enqumlayo.