Kukhangelwa iziporho eziginya imali kumasebe kaRhulumente
UNkosi Mzamo Buthelezi uthi abantu ababandakanyeka kurhwaphilizo emasebeni kaRhulumente baza kuthathelwa amanyathelo.
Image: Public Service
UMphathiswa weeNkonzo zoluNtu (Public Service and Administration), uNkosi Mzamo Buthelezi, uthi baza kuyibek' apha abafunyenwe benesandla ekubiweni kwemali emasebeni.
Ngenxa yorhaphilizo olugqugqisayo kumasebe kaRhulumente, isebe likaNkosi Butheli liqokelela iinkcukacha zabantu abasebenza kaRhulumente ukusukela komkhulu ukuya emaphondweni.
Amatiletile enziwayo alandela ingxelo ekhutshwe nguMphathiswa weZimali, uEnoch Godongwana, obonakalise ukunyuka kwemali echithwa kubasebenzi abanqunyanyisiweyo nakubantu ekuthiwa ziziporho (abasebenzi bomgunyathi ababhatalwayo bengazange babekhona).
Uphando lwenziwa lisebe leZimali neArhente yerhafu (Sars). "Singamasebe kaRhulumente sisebenzisana ngokubambisana," utshilo uMphathiswa ethetha kwiSABC News kutshanje.
"Sesikhuphe ingxelo egcweleyo enobungqina. Ngoku sisebenzisana nesebe leZimali noSars ngoba sifuna ukuvumbulula ubuqhophololo obenzekayo emasebeni. Kuya kuthi xa kugqityiwe ukungqinisiswa iinkcukacha eziqulethwe yingxelo - siza kudiza yonke into elubala.
"Ukuba kufunyenwe abantu ababandakanyeka kurhwaphilizo nobuqhophololo, baza kuthathelwa amanyathelo aqatha," utshilo uNkosi Buthelezi. UMzantsi Afrika uyaqhwalela kwicala lokusa iinkonzo ebantwini ngenxa yokushokoxeka kwezimali.
Ingxelo ekhutshwa nguMphicothizincwadi ibonisa ukungasetyenziswa kakuhle kwemali ukusukela koomasipala ukuya emasebeni kaRhulumente kwilizwe lonke. Kukrokrelwa ukuba izigidi zeerandi ziginywa ngabantu ekuthiwa bangabasebenzi babe bengazange babe khona kwaRhulumente.