Iindaba

'Uyakuhlala usisibane esingacimiyo ebomini bam' - utshilo unkosikazi uPhilisiwe Mthethwa!

Pedro Mapelo|Published

Ubekwe kwikhaya lakhe lokugqibela uNathi Mthethwa, obengunozakuzaku eFrance, emva kwenkonzo ebibanjelwe eSiyabonga Sangweni Compex Stadium izolo.

Image: ANC

Ubekwe kwikhaya lokugqibela ngesidima uNathi Mthethwa obengunozakuzaku woMzantsi Afrika kwilizwe laseFrance.

Oku kwenzeke ngeCawe egqithileyo emgcwabeni woburhulumente obuzinyaswe nguMongameli Cyril Ramaphosa, isekela lakhe uPaul Mashatile, iinkokeli zeAfrican National Congress, iinkokeli zokuhlala nezemibutho yezopolitiko kwaMbonambi kwiphondo laKwaZulu-Natal.

Umzimba kaMthethwa ugaleleke eMzantsi Afrika ngentsasa yangoLwesihlanu ogqitileyo uphelekwe ngabantu bekhaya usuka eFrance. UMthethwa wabhaqwa ebanda kwihotele yaseParis, eFrance, ngomhla wamashumi amathathu kwinyanga ephelileyo.

AmaPolisa aseFrance athi kubonakala ngathi waziphosa phantsi esuka egumbini lakhe eliphezulu (22nd floor) kwihotele awayekuyo ngomhla wesehlo. Phambi kokubuya komzimba wakhe, abantu bakwaMthethwa bathathe umoya wakhe ngendlela yesiNtu besebenzisa ihlamvu lomphafa.

Eminyakeni eyadlulayo, uMthethwa wayengumphathiswa wamaPolisa phantsi kukaMongameli Jacob Zuma. Waye ngumphathiswa weZemidlalo, iNcubeko noBugcisa emva kok phantsi kukaMongameli Ramaphosa.

Unkosikazi wakhe, uPhilisiwe Mthethwa, awazimanya naye kwiminyaka elishumi elinambini eyadlulayo umkhaphe ngamazwi amnandi emngcwabeni obubanjelwe eSiyabonga Sangweni Complex Stadium.

"Andingeke ndimbuze uThixo ngothando olungaka olubonisileyo. Endikucelayo kuye kukuba akugcine ndide ndisondele kuwe. Wena ulilitha elingasoze licime kum. Noxa ukufa kukusithelisile emehlweni wam - kodwa akukho nto eyakuze icime umlilo owawulayita emoyeni wam ngaphakathi," utshilo uPhilisile Mthethwa.

UMongameli Ramaphosa ucele abantu baseMzantsi Afrika ukuba bawonge uNathi Mthethwa ngokuzibophelela kwinkululelo. "Masimwonge ngokuvuselela ngokusebenza ngokuzimisela sibeke phambili abantu abahlelelekileyo.

"Masikulwe ukungalingani kwabantu sithethelele abantu abangathathintweni. UMthethwa ukulwele ukulinganiswa kwabantu, ubulungisa nobumbano. Waye wavuma ukuba ngunozakuzaku ngoba ebezimisele ukulisebenzela ilizwe lakhe," utshilo uRamaphosa.