Iinkxalabo ngokuvalwa kweekliniki eGqeberha

Umbutho wabasebenzi bakarhulumente (PSA) uvakalise inkxalabo ngokuvalwa kwekliniki yaseMotherwell kwaNU 2 eGqeberha, nalapho amalungu achaze ukuba eli ziko lezempilo alisebenzi ngenxa yoqhankqalazo lwabahlali.

Lo mbutho uthi udibene namalungu athe avakalisa inkxalabo yokuba abaphathi besithili bababizele entlanganisweni, nalapho bavakalise ukuxhalaba kwabo ngokunqongophala kwabasebenzi, bengakhange bathathele ingqalelo abasebenzi abaqeshiweyo ekliniki, nto leyo ekhokelele ekubambezelekeni kweenkonzo ezinikezelwa eluntwini.

"I-PSA ivakalise inkxalabo yokuba ngethuba la malungu etyelela ezi kliniki, abaphathi besithili babonakala beboyikisa abasebenzi ngokubohlwaya ngendlela abaziphatha ngayo bengakhange bathathele ingqalelo iinkxalabo ezivezwayo, nengumngeni omkhulu kwesi sithili," itshilo iPSA.

Ithi umba wokhuseleko usengumceli mngeni nanjengoko kwaxelwa ngomhla we10 kweyoMsintsi 2025 ukuba isithuthi esasizisa amayeza saphangwa ngompu esangweni lekliniki. Kuthiwa kwiveki ephelileyo ikliniki ibivaliwe ngenxa yokunqongophala koongikazi ababelekisayo nabanye abongikazi kwisebe elijongene nezigulana ezingalaliswayo.

I-PSA icela iSebe lezeMpilo ukuba lithobele isicwangciso salo sengqesho ukuqinisekisa ukuba zonke izithuba ziyazaliswa.

"I-PSA ikwamemelela ukungenelela kweqela loKhuseleko loLuntu ukuthumela igqiza elikhethekileyo lokuphucula ukhuseleko kwiindawo zaseNelson Mandela Bay, eziquka iKariga, ngakumbi iRosedale," itshilo.

Ikliniki yaseRosedale isavaliwe ngenxa yemilo phakathi koonqevu kule ndawo engqonge ikliniki nezikolo.