Kubanjwe amadoda amabini, kwathinjwa imipu emithathu engekho semthethweni eOR Tambo

Amapolisa esithili saseOR Tambo afumene imipu emithathu engenazimpepha mvume ze abamba amadoda amabini kwiziganeko ezahlukeneyo kule mpelaveki iphelileyo.

Icandelo lamapolisa iStock Theft Task Team libambe aba barhanelwa ngoMgqibelo, umhla wama23 kweyeKhala 2025.

Isithethi samapolisa uKapteni Welile Matyolo uthi eli qela lifumene ulwazi olukhokelele ekubanjweni kwabarhanelwa.

"Kwisiganeko sokuqala, ngentsasa yangoMgqibelo umhla wama23 kweyeThupha 2025 ngezithuba zentsimbi ye01:55, amalungu agqogqa umzi okwingingqi yaseMaseleni, eUpper Tyirha Administrative Area, kutyholwa ukuba amalungu azazisa njengamapolisa – umrhanelwa uye waphuma ephethe umpu ekhombe amapolisa, wadutyulwa [ngamapolisa] wonzakala," utshilo uMatyolo.

Kuthiwa kwindawo yexhwayelo, amapolisa afumene imipu emibini. Obenephepha mvume ubekunye nexhoba, ngelixa owesibini [ongenampepha mvume] wawuzinyeliswe phantsi komatrasi. Indoda enamashumi amahlanu anesihlanu (55) ubudala isiwe esibhedlele ukuze ifumane unyango, nalapho igcinwe phantsi kweliso lamapolisa.

Ingxelo yamapolisa ithi kuye kwaqhutywa uphando lokuqala, nalapho kwadiza ukuba lo mpu ungekho semthethweni ngowendoda enamashumi amathandathu anesithathu (63) yaseGqeberha. Iinkqubo zenkundla ziya kulibaziseka de imeko yakhe yezempilo imvumele ukuba alungele inkundla.

Eli qela liqhubekile nolu phulo, laze latyelela umzi oseMdeni, kuQumbu, nalapho kubanjwe umfana oneminyaka elishumi elinesithoba (19) ubudala ngenxa yokuba nemipu emibini engekho mthethweni (umpu wohlobo lweshotgun nowe9mm) oneembumbulu.

Uza kuvela phambi kwenkundla kamantyi wakuQumbu ngoMvulo umhla wama25 kweyeThupha 2025 ngezityholo zokuba nemipu nembumbulu ngaphandle kwephepha mvume.