Bangaphezu kwe160 abafundi baseGobizizwe abaphumileyo esibhedlele
Bangaphezu kwe160 abafundi baseGobizizwe abathe baphuma esibhedlele emva kokuba belaliswe ngenxa yokuguliswa kukutya abakutyileyo.
Image: Umfanekiso ogciniweyo
Isebe lezempilo eMpuma Koloni liqinisekise ukuba likhulu elinamashumi amathandathu anesixhenxe (167) abafundi besikolo sezolimo iGobizizwe Agricultural School eMthatha abathe baphuma esibhedlele emva kokuba belaliswe esibhedlele ngenxa yokutya abebekutyile.
Isithethi seli Sebe, uSiyanda Manana, ungqinile kwiphephandaba I’solezwe lesiXhosa ukuba abafundi abakwikhulu namashumi amathathu ananye (131) abalaliswe esibhedlele ngoLwesithathu bakhululwe. Abanye abafundi abangamashumi amathathu anesithandathu (36) abangeniswe esibhedlele namhlanje, ngoLwesine, nabo bakhululwe.
"Abafundi abangamashumi amathathu anesithandathu (36) bathunyelwe kwisibhedlele saseMthatha iMthatha Regional Hospital ngeenqwelo zezigulane. Baye banyangwa bagoduswa," utshilo.
Ekuqaleni, kubhengezwe ukuba abafundi abangamashumi asixhenxe (70) besikolo iGobizizwe Agricultural School bathunyelwe kwisibhedlele iNelson Mandela Academic Hospital, Mthatha Regional Hospital naseNgangelizwe Community Health Centre emva kokugula ngenxa yokutya abakutyileyo.
Kuvakala ukuba aba bafundi bagabha, besithi baqaqanjelwa sisisu, abanye baxhuzula logama abanye baye banezisu ezihambisayo nto leyo ebangele ukuba babalekiselwe kwizibhedlele ezahlukeneyo ezingqonge uMthatha.
NgoLwesithathu ngethuba kusenzeka esi sehlo, imeko yezempilo yabafundi ibimaxongo kwaye uManana wangqina ukuba banazo izixhobo ezifana neenqwelomoya zokuthutha abantwana basiwe kwiingcali kwizibhedlele ezibangqongileyo ukuba izinto zifikelela kwelo nqanaba.
Abafundi kuthiwa batye irayisi nentlanzi esetotini (Pilchard) nebangele ukuba bagule.
Kuyaqhutywa uphando ngesi siganeko.