Iindaba

ConCourt ibuyisele ityala likaPlease Call Me kwiSCA kwakhona

Cwayita Nondula|Published

Ityala likaNkosana Makate ngakuVodacom liphinde labuyiselwa kwiNkundla ePhakamileyo yeziBheno yiNkundla yoMgaqo-siseko.

Image: Umfanekiso ogciniweyo

INkundla yoMgaqo-siseko (ConCourt) ithathe icala likaVodacom, yathumela ityala elibandakanya owayila iPlease Call Me, uNkosana Makate, kwiNkundla ePhakamileyo yeziBheno (SCA) kwakhona.

Isigwebo, esiwiswe ngoLwesine, sinxulumene nesicelo sikaVodacom sokubhena ngokuchasene nesigwebo seSCA kweyoMdumba ka2024.

INkundla yoMgaqo-siseko igwebe ngelithi iSCA yenze iimpazamo ezininzi ekuvavanyeni isibheno sikaVodacom ngokuchasene nesigqibo seNkundla ePhakamileyo.

INkundla ePhakamileyo ekuqaleni yayalela uVodacom ukuba ahlawule uMakate phakathi kwe5% ne7.5% yemali eyenze ngokusebenzisa iPlease Call Me kule minyaka idlulileyo.

Ngokumayelana neSCA, iqela labomthetho elincinane liqikelele ukuba imbuyekezo ikwikhulu elinamashumi asibhozo anesithandathu ezigidi zeerandi (R186 million), ngelixa uluvo lwesininzi luqikelela ukuba imbuyekezo kaMakate iphakathi kwamashumi amabini anesithoba eebhiliyoni zeerandi (R29 billion) namashumi amathandathu anesithathu eebhiliyoni zeerandi (R63 billion).

Ngaphandle koku, ummeli kaMakate uxelele iConCourt ukuba uMakate uzimisele ukuhamba nemali engaphezulu kweebhiliyoni ezilithoba zeerandi (R9.4 billion).

NgoLwesine, iSekela eliBambeleyo leJaji eyiNtloko uMbuyiseli Madlanga unike isigwebo sakhe sokugqibela.

Ijaji iqaphele ingxoxo ephakanyiswe ngabakwaVodacom yokuba iSCA idlulele ngaphaya kwamandla ayo ngokususa umyalelo weNkundla ePhakamileyo yaseGauteng yafaka owayo, nangona khange kubekho isibheno sikaMakate.

“INkundla ePhakamileyo yeziBheno, ngoko ke, yamisela umba owawungekho phambi kwayo, nto leyo ekophula umthetho kunye nelungelo lokuxoxwa kwetyala ngokufanelekileyo ngokweCandelo lama34 lomgaqo-siseko," utshilo uMadlanga, ebhekisa kwingxoxo ephakamiswe nguVodacom.

"Inkundla ayizukuthatha isigqibo malunga nesiphelo sale mpikiswano. INkundla yoMgaqo-siseko ikholelwa ekubeni isibheno asivavanywanga ngokufanelekileyo, ngoko ke, umba lowo kufuneka udluliselwe ukuze uphinde uqwalaselwe."

Ethetha neIOL, uMakate uthe: "Ndikholelwa ukuba ndisenetyala eliqinileyo, ndinethemba lokuba iSCA iza kuqinisekisa ubulungisa kwibango lam kwaye iyalele uVodacom ukuba andihlawule imali abandityala yona ngento endayidalayo."