UMphathiswa wezoThutho uchithe ibhodi yakwaRAF

UMphathiswa wezoThutho, uBarbara Creecy, uchithe iBhodi yabaLawuli beNgxowa mali yeeNgozi zeNdlela (RAF) ngenxa yolawulo nemingeni yokusebenza ethe yaqhwalelisa iRAF ekuphumezeni ngokukuko igunya layo elisemthethweni.

IRAF ijongene neengxaki, eziquka iyantlukwano enzulu phakathi kwebhodi, ekhokelele ekuphunyezweni kwezigqibo ezininzi ngokuvota endaweni yokufikelela kwimvumelwano, nto leyo ebonakalisa ukungabikho kobumbano kwiinkqubo zokuthathwa kwezigqibo ezibalulekileyo, itsho ingxelo yeSebe lezoThutho.

Oku kuthiwa kukhokelele ekulahlekeni kokuzithemba kubuchule bebhodi bokuqhuba eli qumrhu ngokufanelekileyo.

Ukusabela oku, uMphathiswa uCreecy usebenzise amagunya akhe njengoGunyaziwe oLawulayo ngokwenza ungenelelo lokukhusela isidima seziko kunye nokuqinisekisa ukuqhubeka nokusebenza kweli ziko – olu ngenelelo lubandakanya isaziso senjongo yokuchitha ibhodi.

UCreecy wenze isicelo kwiSebe likazwelonke elilawula iimali zikarhulumente ukuba linyule uGunyaziwe weZimali. Ngaphaya koko, inkqubo yokukhangela abantu nokubaqesha iye yaqaliswa ukuze kuziswe iinkokeli ezikwaziyo ukukhokela iRAF ukuba iqhubele phambili.

Ukongeza, iSebe likaCreecy liqinisekise ukuba kukho ukusekwa kweKomiti yeeNgcebiso zeNgcali kwaye licele iCandelo eliKhethekileyo loPhando (iSIU) ukuba lifumanise ukuba ngaba uphando lwangoku lubandakanya iinyanga ezintathu ezidlulileyo.

Phakathi kolu tshintsho, uMphathiswa ukubethelele ukuzinikela kweSebe lakhe ukuqhubeka nokulandela onke amanyathelo ayimfuneko okubuyisela uzinzo kwiziko kunye nokwandisa amandla eRAF ukuze izalisekise izibophelelo zayo ezisemthethweni kuluntu kunye nokuqinisekisa ukufikelela okukhawulezileyo nokulinganayo kwiRoad Accident Benefit Scheme ngamaxhoba eengozi zendlela.