UMchunu uthi ukulungele ukuphendula izityholo zikaMkhwanazi!

UMphathiswa wamaPolisa, uSenzo Mchunu, ulamkele inyathelo lokumnqumamisa okwethutyana elithathwe nguMongameli Cyril Ramaphosa ngempelaveki egqithileyo.

Oku kulandele izityholo ezenziwa nguMkomishinala wamaPolisa aKwaZulu-Natal, uNhlanhla Mkhwanazi, owathi uMchunu usebenzisana nezaphulimthetho futhi nguye owachitha ibutho elaliphanda ukubulawa kwabezopolitiko.

Kwiveki ephelileyo, uMnchunu uye wakukhanyela ukusebenzisana nezaphulimthetho ngaphakathi nangaphandle kwenkonzo yesipolisa atyholwe ngako. UMkhwanazi wathi kukho iinkokeli zopolitiko, abetshutshisi, amapolisa, neejaji ezixabe endleleni yomthetho ngenxa yokusebenzisana nabathengisi beziyobisi.

Wafunga ngelithi uza kulwa kude kube sesiphelelweni nokuba ulahlekelwe bubomi bakhe na. Ngenxa yezo zityholo ezibe ngundabamlonyeni kwilizwe lonke, uMongameli Ramaphosa uthe uza kuseka iKomishini eza kuphanda nzulu konke okubi okwenzeka emapoliseni okuchazwe nguMkhwanazi kwiveki engaphaya kwephelileyo ngethuba ethatha namajelo eendaba eDurban.

UMchunu uthe ukulungele ukuphendula zonke izityholo azityatyekwe nguMkhwanazi. Abantu abaninzi bamemelele ukususwa kwakhe esikhundleni emva kwentetha yoMkomishinala waKwaZulu-Natal.

Kodwa akubanga njalo emva kokuvakala kweendaba ezithi uMchunu uye wacela uMongameli ukuba amnike ikhefu ukuze aphendule kwintlanganise yeveki ephelileyo echazwe liphephandaba langeCawe. "Ndiyasihlonipha isigqibo esithathwe nguMongameli futhi ndiyazibophelela kwinkqubo eza kuqalwa yiKomishini esekiweyo.

"Ndizimisele ukuziphendula izityholo ezibekwe kum ngokunyaniseka phambi kwabantu baseMzantsi Afrika," utshilo uMchunu kwingxelo ebhaliweyo ekhutshwe lisebe lakhe emva kwesigqibo esithathwe nguMongameli izolo ochonge uFiroz Cachalia njengoMphathiswa obambeleyo.

IKomishini iza kuqala umsebenzi wayo ngomhla wokuqala kwinyanga ezayo phantsi kwesekela leJaji eyintoko, uMnu. Mbuyiseli Madlanga, onikwe iinyanga ezintandathu zokuwenza awugqibe umsebenzi.