Kubhubhe abakhwetha abane eOR Tambo

UMasipala wesithili iOR Tambo uqinisekise ukuba bane abakhwetha abathe babhubha kwesi sithili kweli xesha lolwaluko lwasebusika ukuzothi ga ngoku.

"Babengengomakhwenkwe kuphela, babengamaphupha aqhubekayo, ikamva elikhulayo kunye nethemba eliphilayo leentsapho zabo. Ubomi babo babuphathiswe isiko elijoliswe ukubahlonipha kwaye loo ntembeko iye yangcatshwa," sitshilo isithethi salo Masipala uNcebakazi Kolwane.

UKolwane ethetha neli phephandaba I’solezwe lesiXhosa uqinisekise ukuba ababini kwabakhwetha abane ababhubhileyo ngabaseNgqeleni, omnye ngowakuQumbu nomnye waseLusikisiki.

Lo Masipala uthi khange balindele ukuba le ntlekele yenzeke ukuze basebenze, kwiiveki eziphambi kokuvulwa kwexesha lolwaluko basungule amaphulo angaphaya kwamashumi amahlanu kwisithili siphela bedibanisa iingcali zempilo, iingcali zomthetho, Iinkokeli zemveli kwakunye noluntu.

"Senze konke okusemandleni ethu ukunqanda le ntlungu kodwa, imiphefumlo emine ayisekho. Le miphefumlo yomine mininzi kakhulu kwaye ayamkelekanga," utshilo uKolwane egameni likaMasipala.

Lo Masipala uthi kubizwe indibano ngokungxamisekileyo noSekela Mphathiswa weMicimbi yeMveli, uKumkani uNdamase neenkokeli zasekuhlaleni ukuze kujongwane nalo mba.

UKolwane uthe ungenelelo olukhawulezileyo ngoku oluqhubekayo lubandakanya ukuhlolwa okungxamisekileyo kwazo zonke izikolo zolwaluko ezingekho mthethweni, ukuthotyelwa ngokupheleleyo ngokuhambelana nomthetho wolwaluko lwesintu kunye namaphulo okuqinisekisa ukuthotyelwa [komthetho] aqhutywa yiCogta, iSAPS, ezeMpilo, uPhuhliso loLuntu kunye neNPA.

"Sicela abazali ukuba babhalise oonyana babo ngokusemthethweni. Sihlaba ikhwelo kwiinkokeli zemveli kunye namagqirha ukuba abeke ubomi phambi kwesithethe. Sihlaba ikhwelo eluntwini ukuba luyeke ukuthula lukhusele ulutsha lwethu. Kaloku isiko akufuneki lihlawulwe ngegazi," utshilo uKolwane.