‘Inqunyanyisiwe’ imfazwe phakathi kweIran noSirayeli
USirayeli neIran ngoLwesibini bamkele isicwangciso sokuphelisa imfazwe esicetyiswe nguMongameli waseMelika uDonald Trump nangona kukho iingxelo ezithi isivumelwano asikho ngokusesikweni.
Image: Atta Kenare / AFP
Ngokwengxelo ekhutshwe nguMongameli waseMelika uDonald Trump, kuvunyelwe ngoxolelwano nokunqunyanyiswa kwemfazwe eqhubeka phakathi kwelizwe lakwaSirayeli nelizwe laseIran. Nangona kukho iingxelo zokuba iIran ihlasele ngeentolo mlilo emva kwesi sibhengezo.
Oku kuza emva kokuba la mazwe mabini eqalise ukuhlaselana ngamandla kwezi ntsuku zilishumi elinesibini zigqithileyo.
Ukusukela oko la mazwe eqalise ukuhlaselana, bekucaca kona ukuba kudibene iinkunzi ngeempondo, nangona iIran ibisele ithe kratya ngamandla. Ngokohlalutyo malunga nobunganga bemikhosi yamazwe akhoyo ehlabathi, ilizwe laseIran lingentla kwilizwe lakwaSirayeli.
"Kuvunyelwe ngokupheleleyo ukuba kuza kunqunyanyiswa ukuhlaselana phakathi kweIran noSirayeli ukusukela kwisithuba seeyure ezilishumi elinesibini ukusukela ngoku (ngorhatya izolo), sinqwenela ukuba wonke ubani asebenzele ukuphelisa le mfazwe," utshilo uTrump kwingxelo.
Amazwe angoongalonkulu kwihlabathi aquka iMelika, China neRussia, ahlukene kubini ngalo mcimbi. IMelika ixhasa uSirayeli, logama iChina neRussia kutyholwa ukuba zona zihambisana neIran.
Ukungenelela kwala mazwe kule mfazwe bekunokuyenza ukuba ikhokelele kwimfazwe yesithathu yehlabathi.
Iingcali zemicimbi yezopolitiko kwinqanaba lehlabathi zithi ukuba ibinokuqhubeka le mfazwe, ibiza kubangela umonakalo omkhulu kakhulu kumazwe akuMbindi Mpuma.
Kwelinye icala, kukho iingxelo zokuba ilizwe laseIran lithi aziyonyani iingxelo zokuba inqunyanyisiwe le mfazwe. IMelika ihlasele amaziko amathathu elizwe laseIran kwaye ngenxa yoko iIran ayibonakalisi ukuba ingaxola ngokukhawuleza.