Iindaba

Kufunyenwe imizimba emibini etshileyo kwaNobuhle

Cwayita Nondula|Published

Amapolisa afumene imizimba emibini etshileyo yabasetyhini abangaziwayo KwaNobuhle.

Image: SAPS

Amapolisa avule amatyala amabini okubulala kulandela ukufumanisa imizimba emibini eKhayelitsha, KwaNobuhle ngentsasa yangoLwesithathu.

Isithethi samapolisa uKapteni Andre Beetge, uthe malunga nentsimbi ye08:35, amapolisa aye aziswa malunga nemizimba efunyenwe kumatyholo akufuphi ne4th Avenue, eKhayelitsha.

"Ukufika kwabo apho, amapolisa abhaqa imizimba etshiswe kakhulu yabasetyhini ababini abangaziwayo. Uphando lokuqala lubonisa ukuba amaxhoba aqikelelwa ukuba aphakathi kwe17 kunye ne19 leminyaka ubudala. Aba babhubhileyo abakaziwa okwangoku.

Unobangela wesi senzo sobundlongondlongo asaziwa kwaye abecuphi besikhululo samapolisa aKwaNobuhle bayakuphanda oku bekhokelwa licandelo leSerious Violent Crimes.

Amapolisa abongoza uluntu olunokuba nalo naluphi na ulwazi olunokunceda kolu phando. Nabani na onolwazi angatsalela iSAPS Crime Stop kule nombolo 08600 10111 okanye asebenzise iMySAPS App. Abantu abanolwazi banokuza ngaphambili kwaye bakhethe ukungawaxeleli amagama abo.