Bafunda beme ngeenyawo kwizikolo zaseOrange Farm
Ukungabikho kweedesika nezitulo kwizikolo ezibini zaseOrange Farm kuyayichaphazela inkqubo yokufunda.
Image: Shutterstock
Ngenxa yokunqongophala kweedesika nezitulo, abafundi kwisikolo samabanga aphakamileyo iJabulile neRaphela eOrange Farm kwiphondo laseGauteng bafunda beme ngeenyawo.
Ukunqongophala kweedesika nezitulo nokungabikho kwamagumbi okufundela aneleyo kuko okubangela le ntlungu kwaba bafundi. Oku kudizwe ligqiza lamalungu wekomiti yombutho weDemocratic Alliance (DA) ejikeleza ejonga iingxaki zemfundo kuzwelonke.
Osisithethi semicimbi yezemfundo kwiDA, uSergio Isa Dos Santos, uthi imeko imbi kakhulu kwizikolo abathe bazihambela eOrange Farm.
"Kwigumbi elinye ufumana abafundi abakumashumi amathandathu, kukwakho ingxaki yamagumbi angekho mgangathweni ngenxa yemeko embi yezi zikolo zibini," utsho uDos Santos.
Ilizwe loMzantsi Afrika ngokubanzi linengxaki yezikolo ezinqongopheleyo, maxa wambi ezikhoyo izikolo zikude neendawo abahlala kuzo abafundi nootitshala.
"Asoze siphumle de urhulumente wephondo laseGauteng enze umsebenzi wakhe wokunika abafundi iindawo zokufundela kwakunye needesika nezitulo esikolweni," ucacise watsho uDos Santos.
Uhambisa athi bengumbutho weDA banesicwangciso esicacileyo malunga nokumele ukuba kuyenziwa ukuphucula imeko yezikolo kweli phondo laseGauteng.
Ukugcwala okugqithisileyo kwezikolo kubangela uxinzelelo olumandla kootitshala nakubafundi ngokunjalo.