UShivambu ususiwe njengoNobhala Jikelele weMK Party

UFloyd Shivambu ususiwe njengoNobhala Jikelele weMK Party emva kohambo lwakhe lwaseMalawi apho wayetyelele ibandla likaShepherd Bushiri, umbutho uchaze esi senzo njengento echasene "nemimiselo yomgaqo-siseko weMK Party." Njengoko ehliselwe, usiwe ePalamente.

Umbutho weMK Party ubenendibano noonondaba eThekwini ngenjikalanga yangoLwesibini, uMququzeleli kazwelonke walo mbutho uNathi Nhleko ufunde ingxelo egameni likaMongameli weMK Party uJacob Zuma ebhengeza esi sigqibo.

UNhleko uthe uZuma udibene namaGosa kaZwelonke eMK Party ngoMvulo ukuxoxa ngobume bombutho. Njengenxalenye yeengxoxo zamaGosa kaZwelonke, umba ophathelele kuhambo lwakutshanje olwenziwe nguShivambu oluya eMalawi uye waqwalaselwa.

"Emva kweengxoxo ezinde kunye negalelo elikhulu elivela kumaGosa kaZwelonke, kwagqitywa ekubeni izenzo zikaNobhala Jikelele zichasene nomoya kunye nemimiselo yomgaqo-siseko weMK Party. Ngokukodwa, iCandelo 3(j) phantsi "kwamatyala" limisela oku kulandelayo: Ukuthatha uhambo lwamazwe ngamazwe kunye nokuthatha inxaxheba kwimisebenzi kunye neenkqubo ezichasene ne-ajenda yeMK Party okanye iqela elilihlakani," utshilo uNhleko egameni likaZuma.

UNhleko uthe ngokweengxoxo zamaGosa kaZwelonke, olu hambo ibingeyonkqubo evunywe ngokusesikweni yombutho okanye uMongameli, nto leyo echasene nomgaqo-siseko walo mbutho.

Lo mbutho uthi ukholelwa ukuba isikhundla esitsha sikaShivambu siza komeleza iqela leMK Party ePalamente njengombutho ophikisayo njengoko ethwele ubutyebi bamava njengelungu langaphambili lePalamente.

UShivambu ugxekwe kakhulu emva kokutyelela ibandla likaBushiri owaqhwesha eMzantsi Afrika nenkosikazi yakhe nabafunwa ngabasemagunyeni kweli. Lo Mfundisi waseMalawi uthe akabuyeli eMzantsi Afrika, nasemva kokuba inkundla yaseMalawi iwise isigwebo esathi savumelana nomnqweno woMzantsi Afrika wokuba abuyiselwe ukuze ajongane nengalo yomthetho.