Liswelekile igqala lomzabalazo uGertrude Shope

Igqala lomzabalazo nowayesakuba nguMongameli wombutho wamanina weAfrican National Congress (ANCWL), uGertrude Shope, ubhubhe eneminyaka engama99 ubudala.

Wazalwa ngexesha eliphawulwe yingcinezelo, uhambo lukaShope lwaqala njengomfundisi-ntsapho eNatal naseSoweto. Ngokuzibophelela kwimfundo, wayenenjongo yokuxhobisa abantwana kunye nokuphakamisa uluntu ngolwazi.

Uthe akukuqonda ukusikelwa umda nokungabikho kokusesikweni kwenkqubo yezemfundo ngexesha localucalulo, wenza isigqibo eneminyaka engama29 sokuzimanya neANC.

Iimpawu zakhe zobunkokeli zakhawuleza zabonakala, zamqhubela ekubeni abe nguMongameli weANCWL. Kwesi sikhundla, uShope ube negalelo ekwandiseni amazwi abantu basetyhini kumlo obanzi wokulingana nobulungisa. Wayenenkolelo yokuba abasetyhini badlala indima ebalulekileyo kwinkululeko yoMzantsi Afrika, ebelwela amalungelo abo nokubaluleka komelo lwabasetyhini.

IANC ivakalise amazwi ovelwano ngeendaba zokusweleka kwakhe. Isithethi seANC uMahlengi Bhengu-Motsiri uthe, "Sibuhlungu ngokusweleka kukaGertrude Shope, obomi bakhe bubonise inkalipho nokuzinikela kwinkululeko yabo bonke abemi boMzantsi Afrika."

UBhengu-Motsiri ukwadlulise amazwi ovelwano kwintombi kaShope kunye nawo onke amalungu osapho lwakhe asondeleyo, evakalisa ilahleko evakala kwisizwe siphela.

Ukusweleka kukaShope kuza kwiintsuku emva kokuba uSekela Mongameli weANCWL uLungi Mnganga-Gcabashe ebhubhe ngomhla we17 kule nyanga kaCanzibe eneminyaka engama64 kwikhaya lakhe eWestville KwaZulu-Natal.

UMnganga-Gcabashe usweleke emva kokufumana utyando.

WayekwaliLungu lePalamente kunye noSihlalo weKomiti yeMicimbi yezoKhenketho.

Umbutho umchaze "njengetshantliziyo ubomi bakhe bonke kunye nomkhonzi wabantu."

"Lala kakuhle Comrade Lungi. Uhambe ngesidima, ukhokele ngokuthobeka, wanikela ngako konke onakho ungalindelanga nzuzo. Igama lakho libhalwe kwibali lenkululeko yethu," itshilo iANC inika imbeko.