Amalungiselelo okubuyiswa kwamajoni eDRC ayaqhubeka

Umkhosi woMzantsi Afrika (SANDF) uqinisekise uluntu ukuba ayaqhubeka amalungiselelo okubuyiswa kwamajoni eDemocratic Republic of Congo (DRC) nangona iingxelo zibanga ngelithi amajoni ashiyeke eGoma emva kokungafiki kweebhasi ebeziza kuwathutha.

Kwingxelo, iSANDF ithe, "Amalungiselelo okubuyiswa kwamajoni asephantsi kolungelelwaniso olupheleleyo nolawulo loMbutho woPhuhliso lwaMazwe aseMazantsi eAfrika (SADC).

"Sikwaqinisekisa uluntu ukuba onke amalungu eSANDF akhuselekile, abonelelwa ngokwaneleyo kwaye ayaqhubeka nokufumana izidlo zawo zemihla ngemihla nezinto eziyimfuneko. Akukho lungu lishiywe lingenandlela yokuhamba okanye lingenankxaso," siqinisekisile isithethi seSANDF uRear Admiral Prince Tshabalala.

I-SADC ikwawakhabile amabango athi ayiwahoyanga amajoni eGoma, eDRC. "La mabango awanasihlahla, ayalahlekisa kwaye awayibonisi eyona meko. I-SADC inqwenela ukwenza kucace ngokungathandabuzekiyo ukuba onke amalungiselelo malunga nokuthunyelwa kunye nokurhoxiswa ngezigaba kwamajoni phantsi koMbutho woPhuhliso lwaMazwe aseMazantsi eAfrika eDRC (SAMIDRC) aqhuba ngokuhambelana nesicwangciso sokurhoxisa esisekiweyo, ekuthe kwavunyelwana ngaso ngabo bonke abachaphazelekayo," itshilo iSADC.