Iindaba

Sikhatyiwe isibheno sikaMagudumana yiSCA

Cwayita Nondula|Published

Isibheno sikaGqirha Nandipha Magudumana sikhatywe yiNkundla ePhakamileyo yeziBheno.

Image: Timothy Bernard

Inkundla ePhakamileyo yeziBheno (SCA) isikhabile isibheno sikaGqirha Nandipha Magudumana sokuba kubhengezwe ukugxothwa kwakhe eTanzania njengokungekho mthethweni.

Isigwebo sinikezelwe yiSCA ngoLwesihlanu. UGqirha Magudumana ekuqaleni wayefuna ukubanjwa nokugxothwa kwakhe kubhengezwe njengokungekho mthethweni ngo2023, iJaji yasichitha eso sibheno kweyeSilimela waloo nyaka.

UGqirha Magudumana, otyholwa ngokunceda owabanjelwa ukudlwengula kunye nombulali uThabo Bester ukuba aqhweshe kwintolongo yaseMangaung Correctional Centre ngo2022, wabanjwa kunye noBester eArusha, eTanzania, kuTshazimpuzi ka2023.

IGunyabantu lezoTshutshiso (NPA) lisamkele isigwebo seSCA. "Iqela labatshutshisi leNPA ngoku liza kugxila ekuqinisekiseni ukuba ityala eliza kuxoxwa liyaqhubeka ngomhla wama21 kweyeKhala ukuya kowe19 kweyoMsintsi 2025 kwiNkundla ePhakamileyo yaseFreyistata eBloemfontein ngaphandle kokulibaziseka," sitshilo isithethi seNPA kuzwelonke uAdv Mthunzi Mhaga.

UGqirha Magudumana nabanye atyholwa nabo bajongene namatyala angamashumi amathathu anesibhozo (38) ewonke aquka ubuqhophololo, urhwaphilizo, ukuxhaphaza imali ngokungekho mthethweni, ukunceda ibanjwa ukuba liqhweshe, ukuhlukumeza umzimba, ukutshisa, nokuthintela ulawulo lobulungisa.