Nkosi Leslie Sigcau: Aza kuchaza iKumkani yawo ngokusemthethweni amaMpondo eSiphaqeni.
Image: Uthunyelwe
Emva kwengxoxo ende equka ukungena ezinkundleni malunga noyena ufanelekileyo ukuba athathe isikhundla sobuKumkani bamaMpondo, esi sizwe sikhokelwe yindlu kaKumkani Marhelane siza kuchaza igama ekuvunyelwene ngalo.
Oku kusemva kokuba isizwe samaMpondo sathi sashiywa yiKumkani yaso uZanozuko Tyelovuyo Sigcau ngonyaka ka2022.
Ngomhla wamashumi amathathu ananye kuCanzibe yakhothama iKumkani kwaza kwatyunjwa unina weKumkani uNobandla Sigcau ukuba abambele.
Kubekho iqela ebelikhokelwe nguNkosana uDumelani Sigcau eliphume lingena ezinkundleni livakalisa ukuchasa kwalo ukubambela kukaNobandla.
Othethe egameni lesizwe samaMpondo, uNkosi Leslie Sigcau uyacacisa: "Injongo ephambili yale ndibano kukwazisa isizwe ngokubanzi malunga nalawo uza kungena ezihlangwini zeKumkani yethu eyakhothamayo uZanozuko Tyelovuyo Sigcau," kutsho uLeslie Sigcau.
Iingxelo zangaphambili kweli komkhulu zibonise ukuba unyana kaKumkani uZanozuko Sigcau uNkosana uYolisa Sigcau nguye ekuvunyelwana ngaye.
Oku kuchasene nesigqibo sakutshanje esenziwe yiNkulumbuso yeMpuma Koloni uOscar Mabuyane othe wagunyazisa uNkosana uDumelani Sigcau njengebambela Kumkani.
"Le ndibano iza kubanjelwa kwiKomkhulu laseHewu eSiphaqeni, eli komkhulu ke linembali kuba yindawo ekwazalelwa kuyo uKumkani uMarhelane kaSigcau," uhambisa atsho uLeslie Sigcau.
UKumkani Marhelane yenye yeeKumkani zoMzantsi Afrika ezaziyinxalenye yokuncedisa ukusungulwa kombutho weANC ngo1912.
"Indlu kaKumkani Marhelane izele iiKumkani ezine eziquka uMandlonke, Jongilizwe, Thandizulu kwakunye noZanozuko Sigcau, iKumkani eza kungena ngoku iza kuba yeyesihlanu ngokwendlu kaKumkani uMarhelane," kucacisa uLeslie Sigcau.
Lo uza kuchazwa kule mbizo sele enikwe ingubo yakhe ngokwesiko kwakunye nesikhahlelo sakhe, itsho ingxelo.