Amagosa aphezulu kwezemfundo akholelwa ukuba ukuxhasa ootitshala sisisombululo kwizikhewu kwezemfundo.
Image: Phando Jikelo / Independent Newspapers
UNjingalwazi uVeronica McKay uthi ingxaki yokunqongophala kwenkxaso kootitshala kwinkqubo yokufunda nokufundisa yenye yeengxaki ezithe zaqatshelwa ngethuba kuxoxwa ngeengxaki zemfundo ngamazwe angamalungu eG20.
Le Njingalwazi ithethe oku ngethuba ibimenywe ukuba ibeyinxalenye yengxoxo yamagosa aphezulu kwezemfundo kumazwe angamalungu wendibanisela yeG20.
Kwi-Indaba yezemfundo ebibanjelwe eWhite River eMpumalanga, uNjingalwazi McKay uthi amazwe angamalungu eG20 anoxanduva lokuxoxa lo mcimbi banzi.
Ekupheleni kwalo nyaka, amazwe angamalungu eG2O aza kudibana eMzantsi Afrika ukuze ashukuxe ikamva lala mazwe kwezoqoqosho, ezentlalo, ezolimo, ezempilo nokunye.
"Iingxaki abadibana nazo ootitshala abancinci ezikolweni zibonisa ukuba aba titshala badinga inkxaso emandla esuka kurhulumente ukuze kuphucuke umgangatho wezemfundo ngokubanzi," kutsho uMcKay.
Uthi uphando olwenziwe yiThe Teaching and Learning International Survey ibonisa ukuba ootitshala boMzantsi Afrika abaxhaswa ngokwaneleyo kumsebenzi wabo.
AmaSebe ahlukeneyo kurhulumente weli kuquka nabezoshishino baxakeke ngamalungiselelo wendibano yeG20 esele iqalisile ukuxhasa amashishini welizwe loMzantsi Afrika.
Ethetha kule Indaba, uSekela Mphathiswa weMfundo esiSiseko, uGqirha Reginah Mhaule, uthi kufuneka kuqatshelwe indlela abaqala ngayo abantwana xa beqala ukungena kwinkqubo yokufunda nokufundisa.
Imibutho yootitshala kweli ikhala mihla le ngento abayibiza ngokuba kukunganikwa nkxaso ngurhulumente ukuze bakwazi ukwenza umsebenzi wabo ngokukhululekileyo.