Oosomashishini baseNgcobo bavakalise ukungamfuni umphathi kamasipala ngokwenza umngcelele.
Image: Ngcobo FM/Facebook
Abanikazi bamashishini asakhulayo bathi makahambe umphathi waseDr AB Xuma Local Municipality, eNgcobo. Kwiveki ephelileyo ngoLwesithathu, idolophu yaseNgcobo ibivalwe macala ngumngcelele owenziwe ngoosomashishini oye waphelela kwamasipala edolophini - apho bagqithise khona ixwebhu ebeliqulathe izinyanzeliso zabo.
Eyona nto ebiphambili kwizinto abazifunayo kukunqunyayiswa kukaKhathutsheki Mulaudzi ongumphathi eDr AB Xuma Local Municipality. Bamtyhola ngelithi akawuphathanga ngendlela elungileyo umasipala nedolophu yaseNgcobo abathi ayihoywanga.
Oosomashishini bathe kunzima ukusebenza eNgcobo ngoba ukwakhiwa kwendawo yeeteksi kwayekwa esithubeni, iindlela ezingena edolophini azihambeki, iitephu zayeka ukuphuma amanzi - into eyenza kube nzima koosomashishini baseNgcobo.
Ngethuba loqhankqalazo, bekungekho moto ezidlulayo eNgcobo ngoba iindlela bezivalwe ngezigadla ezinqandwe zisiya kwezinye iindawo. "Eyona nto esizidla ngayo apha, iHero's Park, ayikhathalelwanga," utshilo uThandi Jezile obenikwe uxanduva lokukhokela inkqubo yosuku.
"Akukho ndlela ezilungiswayo, akukho manzi, akukho zindlu zangasese, akucocwa dolophu futhi akukho sicwangciso sokusebenza esicacileyo sikamasipala. Akukho mntu ongatyala imali yakhe apha kunje," utshilo uJezile, obethethela oosomashishini baseNgcobo abatsho ngazwinye ukuba abamfuni uMulaudzi.
Omnye usomashishini uthe umsebenzi kamasipala unikwa iinkampani ezisuka kwezinye iindawo. Uthe abayithandi lo nto ngoba idodobalisa uqoqosho lwendawo yabo. UJezile, ofunde uluhlu lezinyanzeliso, uthe bafuna kuphandwe indlela awaqeshwa ngayo uMulaudzi nezigqibo zemali ezenziwe phantsi kolawulo lakhe kumasipala waseNgcobo.
Oosomashishi balebele ngelithi bafuna uRhulumente wephondo aluthathele kuye ulawulo ukuze kunqandwe ulawulo oluhexayo kwamasipala. Izikhalazo zoosomashishini zifikisene nentetho kaMongameli uCyril Ramaphosa ayiwise eGqeberha - apho abalule ukungasebenzi kakuhle koomasipala njengento eyingxaki eqhwalelisa iMpuma Koloni.
Related Topics: