UMongameli uCyril Ramaphosa ngethuba ebetyelele izibuko laseNgqura ekunye neNkulumbuso yaseMpuma Koloni uOscar Mabuyane nezinye izidwangube.
Image: Office of the Premier EC
Kusuku lokuqala lotyelelo lwakhe eMpuma Koloni, uMongameli uCyril Ramaphosa uvakalise uchulumanco lwakhe ngamaphulo aqhubayo ajolise ekuphuculeni izibuko iNgqura eNelson Mandela Bay. NgoLwesibini, emva kwengcaciso ebanzi evela kuMphathiswa wezoThutho uBarbara Creecy namagosa akwaTransnet, uRamaphosa ucacise ngokuzibophelela kwakhe ekuphakamiseni izinga lokusebenza kweli zibuko.
"Olu ibe lolona tyelelo lokuhlola luchukumisayo kuba ndiye ndakwazi ukubona nokumamela izicwangciso abanazo zokuphucula eli zibuko nokuqinisekisa, njengelona zibuko linzulu lamanzi kweli lizwe, liyakwazi ukutsala iinqanawa," utshilo uMongameli ethetha noonondaba. Utyelelo lwakhe lugxininisa injongo ebanzi yokuphucula ukuhanjiswa kwenkonzo nokukhuthaza ukukhula koqoqosho kwiphondo leMpuma Koloni.
Izibuko laseNgqura eNelson Mandela Bay.
Image: Office of the Premier EC
Izibuko laseNgqura, elilungelelaniswe ngobuchule noMmandla woQoqosho oKhethekileyo weCoega (SEZ), libonwa njengendawo ebalulekileyo yothutho lweenqanawa kuMazantsi eAfrika. URamaphosa uveze ukuba unxweme olukhulu loMzantsi Afrika lunika eli lizwe amathuba amaninzi okusebenzisa amazibuko alo ukuze lixhamle kwezoqoqosho. Ngokuvuselela iNgqura nokuphucula umsebenzi wayo, urhulumente unenjongo yokuvula iindlela zorhwebo ezibalulekileyo kunye nokuqinisa urhwebo lwengingqi.
Namhlanje, uRamaphosa kulindeleke ukuba adibane neNkulumbuso yaseMpuma Koloni uOscar Mabuyane kunye nesigqeba sakhe ukuze baxoxe ngeemeko namathuba akhoyo kweli phondo. Le ndibano yentsebenziswano iyinxalenye yesicwangciso sikaMongameli sokumilisela intsebenziswano phakathi koorhulumente, eqinisekisa ukuba amanqanaba ohlukeneyo karhulumente asebenza ngokubambisana ukujongana nemiba yephondo engxamisekileyo.