UMfundisi ofune iminikelo ngetshova uthi ufumene izigrogriso zokubulawa.
Image: File
UMfundisi waseMelika uMarvin Sapp udize ukuba wafumana izigrogriso zokubulawa emva kokuba ividiyo yakhe eyalela ukuba kuvalwe iingcango ukuze ibandla lakhe linyuse iminikelo ukuya kumashumi amane amawaka eedola ($40 000) iye yasasazeka kumakhasi onxibelelwano.
Uxelele ibandla lakhe oku ngexesha lomsitho wecawe eBaltimore kweyeKhala ka2024 kwaye ividiyo yakhe esenza esi sicelo ifumene ukugxekwa ngabantu. USapp onguMfundisi webandla iThe Chosen Vessel eFort Worth, eTexas, uthethe ngesi sehlo ngethuba esenza udliwanondlebe kwinkqubo kanomathotholo iRickey Smiley Morning Show ngoMvulo wale veki.
Ngokutsho kweVibe, uMfundisi Sapp uthi ufumene izigrogriso zokubulawa ezisuka kubantu ababebukele le vidiyo.
Lo msitho ububanjelwe e109th Pentecostal Assemblies of the World Convention eBaltimore, kwaye ubanga ukuba le mali ibijoliswe kuhlahlo lwabiwo-mali lwenkomfa.
"Abantu bebenengxaki ngendlela endithethe ngayo, kwaye ngokujonga le vidiyo, mhlawumbi benditshova ngendlela ebekungafanelanga ukuba ndenze ngayo, kwaye ndingaxolisa ngalo nto," ucacise watsho uMfundisi, ewaphika amabango okuba iingcango zecawe zavalwa.
Uveze ukuba yonke le nto ibuchaphazele ubomi bakhe, icawe yakhe, nabantwana bakhe. "Abantu bebefowunela ibandla lam bandithuke. Abasebenzi bam bayoyika kuba ndifumene izigrogriso zokubulawa. Bakhe beza ecaweni yam bezokuzama ukundibangela iingxaki," utshilo.
Kwividiyo ejikeleza kumakhasi onxibelelwano, lo Mfundisi uvakala esithi, “Niyi1000, ndithe valani iingcango. Ushers, valani iingcango.
"Kukho i1000 apha ngokuhlwanje, kwaye kukho i1000 ebukele kwi-intanethi. Ukuba ndifumana abantu abayi1000 kwi-intanethi ukuba banikele nge$20 kunye ne1000 elapha yenze njalo, ingadityaniswa i$40 000 ngokuhlwanje."
Bukela le vidiyo yalo Mfundisi ingezantsi ijikeleza kumakhasi onxibelelwano.