UTimothy Omotoso uphume etshaya eNkundleni ePhakamileyo yaseGqeberha emva kokuba kuthiwe akanalo ityala elithathe iminyaka esibhozo yonke.
Image: Facebook
Emva kwetyala eliqingqithe iminyaka esibhozo, uMfundisi uTimothy Omotoso, uphume etshaya enkundleni yaseGqeberha izolo emva kokufunyaniswa kwakhe engenatyala. Lo Mfundisi weJesus Dominion International, namarhamente wakhe uZukiswa Sitho noLusanda Sulani, babanjwa ngo2017 emva koko babekwa izityholo ezohlukeneyo eziquka ukudlwengula, ukuthubelezisa abantu nezinye.
KwiNkundla ePhakamileyo yaseGqeberha baziphika zonke izityholo abazibekwa liGunyabantu lezoTshutshiso (NPA). UTimothy Omotoso waseNigeria ebetyholwa ngokuqokelela amantombazana aselula ngeminyaka akugqiba awalale kwiindawo ezahlukeneyo eMzantsi Afrika nakwamanye amazwe.
Phambi kokuwisa isigqibo sakhe, uJaji Irma Schoeman uthe akakwazi ukuthi umtyholwa ophambili (Omotoso) unetyala ngoba izinto azixelele inkundla aziphikiswanga ngumtshutshisi. "Umbuso khange ubonise ukuba okuthethwa ngumtyholwa akuyiyo inyaniso. Ukungabuzwa kakuhle nokungaphikiswa kobungqina bomrhanelwa kubenalo ufuthe kwiziphumo zetyala," utshilo uJaji Schoeman.
Phambi kokukhulula uMfundisi uTimothy Omotoso emakhamandeleni, uJaji Schoeman ucacisile ukuba akazikholelwa izinto azithethayo enkundleni ukuba ziyinyaniso - kodwa akakwazi ukuthi unetyala ngoba umtshutshisi akakwazanga ukucacisa ngokupheleleyo okwenzekayo.
"Ayingomtyholwa ekufanele abonise inkundla ukuba umsulwa. Abatyholwayo abanatyala kuzo zonke izityholo," utshilo uJaji Schoeman. Khange akholelwe umfundisi waseNigeria ngenxa yemincili akuva okuthethwe yijaji.
"Ndibulela uThixo," utshilo enkundleni ekuphoxeke abantu abaninzi abebexhasa abamangeleyo. "Kungcono ndifumane ithuba phambi kokuba ndiveze indlela endiziva ngayo," utshilo ephendula umbuzo weentatheli phambi kokufulathela inkundla.
Konke oku kwenzeka emva kokubulawa kukaPamela Mabini owabhenca izinto ezenzeka kwicawe kaMfundisi Timothy Omotoso. Abantu abaninzi, abaquke oomama beWomen's League, bavakalise ukuphoxeka kwabo ngumsebenzi owenziwe yiNPA.
Related Topics: