Ibhodi yesikolo iBergview College eMpuma Koloni apho ebefunda khona uCwecwe, ifake isicelo sokuthintela isigqibo soMphathiswa wezeMfundo ephondweni uFundile Gade sokuvala esi sikolo.
UGade wenze esi sigqibo emva kwetyala lokudlwengulwa kwentwazana eneminyaka esixhenxe ubudala eyayingumfundi kwesi sikolo saseMatatiele, uMphathiswa ubalule inkxalabo yokhuseleko lwabafundi ngokukhupha isaziso sokuba kuvalwe isikolo. Ukongeza, abaphathi besikolo kuthiwa abazange basebenzisane namapolisa.
"Ityala lodlwengulo lavulwa kweyeDwarha ka2024 kwaye ukuza kuthi ga ngoku lo mba awukaqhubeli phambili. Ulibaziseko lubangelwe ngabaphathi besikolo. ISebe lixhalabile kukuziphatha kwenqununu yesikolo malunga nokwala kwayo ukusebenzisana namapolisa," utshilo uVuyiseka Mboxela obesisithethi soMphathiswa weSebe lezeMfundo ephondweni.
Ngokweengxelo, esi sikolo sicele inkundla ephakamileyo yaseMakhanda ukuba imise izicwangciso zikaGade zokuvala esi sikolo ukuze kuvumeleke uphononongo lwesicelo sokurhoxisa esi sigwebo.
Esi siganeko singenalusini senzeka kulo mntwana siphembelele uqhankqalazo kwiindawo ezahlukeneyo zoMzantsi Afrika, abantu befuna ubulungisa.
UMphathiswa weMfundo esiSiseko, uSiviwe Gwarube kwiveki ephelileyo uthembise ngelithi uza kuceka uMphathiswa wamaPolisa, uSenzo Mchunu, ukuze uphando lukhawulezise.
Kutshanje, iKomiti yezeMfundo, ezeNzululwazi kunye namashishini oBugcisa ivakalise ukuphoxeka kwayo ngendlela elisingathwe ngayo eli tyala liSebe lezeMfundo eMpuma Koloni.
USihlalo wale Komiti, uMakhi Feni, uthe iSebe lezeMfundo eMpuma Koloni bekumele ukuba lenze ingxolo kwaye lithathe amanyathelo angqongqo ngethuba kusenzeka esi sehlo kweyeDwarha 2024.
"Ekuphela kwento esiyenzayo kukulinda kude kubekho ingxolo kumakhasi onxibelelwano, kulapho sisuke senze ngathi kukho into eyenziwayo. Le nto yokulinda abantu benze iihashtag mayiphele, sifuna uxanduva ngoku," utshilo uFeni.
Ngoku isigqibo senkundla silindiwe ukuze kubonwe ukuba sihambe njani isibheno sesikolo.