Abafundi abaphuma eFort Hare University naseWalter Sisulu University bamise ngxi idolophi ngelinyanzelisa ukubanjwa komntu owadlwengula umntana omncinci kunyaka ophelileyo eMatatiele.
Image: Pedro Mapelo/I'solezwe lesiXhosa
Abantu belizwe loMzantsi Afrika bangene ezitalatweni kwangentseni yangoLwesibini kule veki benyevulela ukudlwengulwa komntana oyintombazana okwenzeke kunyaka ophelileyo. Ingxelo ithi intombazana eneminyaka esixhenxe yonzakaliswa ngesondo eBergview College, eMatatiele.
Ziinyanga ezintandathu ngoku yenzeka lo nto kodwa akukabanjwa mntu ngamapolisa. Nangona kusithiwa yinqununu yesikolo erhanelwa ngokwenza isenzo esibi emntaneni – kodwa amapolisa akakatsho ukuba ingumrhanelwa. Kwiingxelo ezijikelezayo kumajelo eendaba, kuthiwa inqunu yakukhaba ukwenza uvavanyo lwencindi.
Yilo nto edale isankxwe nokukhuselwa kwayo yiAfriForum emthethelela ngelithi akukabikho nto eyayamanisa inqununu nesehlo. Abantu baququzelele imingcelele ukuze ingxaki yomntana ikwazi ukuphandwa kakuhle ngamapolisa ekungacaci ukuba ebesenzani iinyanga ezingaka.
Idolophu yaseMonti ibime ngxi yinyambalala yabafundi baseFort Hare naseWalter Sisulu University abavakalise ukungonwabi kwabo kokwenzeke eMatatiele. Ukuphathwa kakubi, ukubiwa nokubulawa zizinto ezixhaphakileyo ebantwaneni nakoomama futhi yinto exakileyo ngoku eMzantsi Afrika.
Abantu abatsha batsho ngazwinye ukuba kwanele ngoku, amadoda makohlukane nokuphatha kakubi abantwana nabantu ababhinqileyo. I'solezwe lesiXhosa lithethe namanenekazi amabini aqabukileyo acele angapapashwa amagama wawo. Omabini akhale ngamapolisa anyotywayo nangakhathaliyo xa kuxelwa kuwo izenzo zempathombi kwizikhululo zamapolisa.
"Ingase amapolisa abahoye abantu abayokumangala kuwo. Uyakwazi ukuya phaya, kuthiwe uyeza umcuphi – kodwa angabonakali," litshilo inenekazi eliyinxalenye yomngcelele. "Kufuneka uhle unyuka ulandela amapolisa. Ayadikwa ngabantu futhi asile.
"Ibuhlungu into eyenziwa ngamadoda ebantwaneni. Phofu ayenza lo nto nalapha kuthi bantu abangoomama. Sicela umthetho wenze indima yawo kwizinto ezinje ngale sikuyo namhlanje [ngoLwesibini]. Ingxaki iqala apha emapoliseni," utshilo.
Lona inenekazi lesibini nalo lithe ingase amapolisa awenze kakuhle umsebenzi wawo. "Emva kolu suku, ingase umthetho wenze indima yawo. Amapolisa awenze kakuhle umsebenzi wawo ayeke ukunyotywa. Kukho amatyala amaninzi angaphandwayo ngamapolisa kuphinde kuduke namadokethi amatyala avuliweyo.
"Umntana kasisi wam wagqibela esebenzisa iziyobisi ngenxa yokudlwengulwa. Zange ihoywe into yakhe ngamapolisa. Makenze umsebenzi wawo kakuhle amapolisa, ohlukane nokunyotywa," utshilo olinkonyileyo igama lakhe.
Related Topics: