Isikhalo sikamama odlwengulelwe umntwana siviwe liSebe lezeMfundo
Image: File
ISebe lezeMfundo eMpuma Koloni libhengeze ukuba isikolo saseMatatiele iBergview College ebesifunda umntwana oyintombazana oneminyaka esixhenxe ubudala odlwengulweyo, sivaliwe – uMphathiswa weMfundo esiSiseko, uSiviwe Gwarube, uthi uza kuceka uMphathiswa wamaPolisa, uSenzo Mchunu, ukuze uphando lukhawulezise.
UGwarube uthi wazisiwe ngesi sehlo. "Ndichithe iiyure ezingamashumi amane anesibhozo ndinxibelelana neSebe lezeMfundo ephondweni leMpuma Koloni ukufumana ulwazi ngeli tyala nokuba iphondo lenzani ngalo," utshilo.
"Ndiyaniqinisekisa bantu baseMzantsi Afrika, siwuhambela phezulu lo mba. Iyandikhathaza kakhulu le nto. Kodwa eyona nto sinokuyenza ngoku kukuqinisekisa ukuba ubulungisa buyenzeka kule ntwazana kunye nosapho lwayo," utshilo uGwarube kwikhasi lakhe lonxibelelwano.
Isithethi soMphathiswa wezeMfundo eMpuma Koloni, uVuyiseka Mboxela, ungqinile ukuba iSebe linike isaziso sokuba kuvalwe amasango esikolo iBergview College kwisithili saseAlfred Nzo West.
"Omnye wemiqathango yokubhaliswa kwezikolo ezizimeleyo kukuba mazibonelele ngendawo yokufunda ekhuselekileyo. Ityala lodlwengulo elibandakanya umfundi oneminyaka esixhenxe esikolweni kunye nophando olukhoyo ngoku, nendlela lo mba osingathwe ngayo yiBergview College yophule imiqathango emalunga nokhuseleko lwabafundi," utshilo uMboxela.
UMboxela uqhubekile wathi iSebe liza kuqalisa ngenkqubo yokufakwa kwabafundi besikolo iBergview College kwezinye izikolo ezikule ngingqi.
Esi sehlo nesenzeka kweyeDwarha ngo2024, sabhengezwa esidlangalaleni ngumama womntwana emva kokuziva engafumani ntsebenziswano kubaphathi besikolo.
Xa lo mama ebalisa, uthi isikolo besiphumile umntwana wakhe ebelinde imoto emsa esikolweni nalapho ifike kade kunesiqhelo. Lo mntwana kuthiwa uxelelwe ngutata osebenza eskolweni ukuba atshayele igumbi lokufundela. Kwiintsuku kamva, yena [umama] nomyeni wakhe baphawula ukuba umntwana akakwazi ukuhamba kakuhle wabekhalaza ngeentlungu. Watyelela ugqirha ukuze anyange iintlungu zomntwana, yaye kwakhona xa bafumanisa into engaqhelekanga kwiimpundu zomntwana nelungu lakhe.
Ugqirha wamcebisa ukuba afune amanye amanyathelo nanjengoko esi siganeko singaphandle kwamandla akhe. Ngeli xesha, abazali bavula ityala bathatha umntwana ukuba afumane uloluleko ngokwasengqondweni nasemphefumlweni. Kwafumaniseka ukuba ngenxa yokwenzakala ngokwasemphefumlweni, umntwana akakhumbuli ukuba kwenzeka ntoni kuye okanye umntu ommoshileyo.
Lo mama ukwabalise ngentlanganiso awayenayo nenqununu eyamxelela ukuba kukho amarhe aweve kootitshala bakhe okuba umntwana udlwengulwe esikolweni. Kutyholwa ngelithi le nqununu yathi ukuba lo mama uqhubeka nokusasaza la marhe, liza kungcola igama lesikolo. "Okwesibini, uthe uluntu luza kubakhupha abantwana esikolweni kwaye oko kuya kuchaphazela isikolo. Okwesithathu, uthe ndiza kujongana nezomthetho ukuba umntwana akadlwengulwanga apha esikolweni," utshilo umama kudliwanondlebe abenalo nePodcast iHope Revolution TV.
Lo mama ukwadize ukuba izinto zajika zakrakra phakathi kwakhe nenqununu.
Ityala lodlwengulo lavulwa ngenyanga yeDwarha ka2024. "Ulibaziseko lubangelwe ngabaphathi besikolo. ISebe lixhalabile kukuziphatha kwenqununu yesikolo malunga nokwala kwayo ukusebenzisana namapolisa," utshilo uMboxela.
Esi sikolo sabhala ingxelo kunyaka ophelileyo singqina esi sehlo. "Sibhala ngokumalunga neendaba ezisasazwa kumakhasi onxibelelwano malunga nesiganeko ekutyholwa ukuba senzeke esikolweni sethu. Nceda uqaphele ukuba okwangoku akukho bungqina bokuba esi sehlo sibi senzeke kumasango esikolo sethu," utshilo uSihlalo weBhodi yeeTrasti uDC van Zyl kweyoMnga ka2024.
Esi sikolo siphinde sanika umzali ileta yokuba umntwana wakhe atshintshelwe kwesinye isikolo nangona umama engazange ayicele.
BUKELA: UFundile Gade, uMphathiswa wezeMfundo eMpuma Koloni uthethe ngesi sehlo nesigqibo seSebe sokuvala isikolo.