Umonakalo wezandyondyo eChris Hani.
Image: Chris Hani District Municipality
Amagosa kaMasipala weSithili saseChris Hani azizantanta ezama ukunceda nokuncedisana nabahlali abanakalelwe zizindlu kooMasipala abathathu besi sithili.
Ingxelo ithi izandyondyo zemvula ezihlasele esi sithili zibangele umonakalo ezindleleni, ezindlini, iibhlorho kwakunye neentambo ezihambisa umbane kwezinye iindawo.
Othethe egameni lalo Masipala uThobeka Mqamelo, uthi amagosa aguqe ngamadolo elindele ukubizwa nangaliphi ixesha kwiindawo ezahlukeneyo zesa sithili. Imvula ena ngamandla kuninzi lweendawo zeMpuma Koloni noMzantsi Afrika zibangele iingxaki kumaphondo aquka iphondo laseKZN.
"Ngomhla wesixhenxe kule nyanga, izandyondyo zemvula enamandla zonakalisa izindlu neentambo zombane kwiilali zaseMpovane naseNongqongwana kuMasipala waseNtsika Yethu, apho konakele izindlu ezilishumi," kutsho uMqamelo.
Umonakalo wezandyondyo eChris Hani.
Image: Chris Hani District Municipality
Kuthiwa le meko igqithele kuMasipala waseSakhisizwe, ngokukodwa kwawadi 7 kwiilali zaseMcewula nalapho kuchaphazeleke izindlu ezilithoba.
"KuMasipala waseDR AB Xuma, umonakalo wenzeke kwiiwadi ezilithoba nalapho kuchaphazeleke ezilishumi elinesihlanu kwaye kulindeleke ukuba umonakalo ukhule ukuba ayiyeki kunetha imvula kuba ezinye sele zimanzi," kucacisa uMqamelo.
Le ngxelo ithi izindlu zodaka zezona zisesichengeni sokuba zingawa phantsi nanini kuba azikhuselekanga ngenxa yemvula engayekiyo ukunetha. "Kwaphaya kuMasipala waseDR AB Xuma, kukho ibhlorho emke namanzi ngenxa yezi zandyondyo zemvula, ukumnka kwayo kubangela ukuba kubenzima ukufikelela kwiindawo ezibalulekileyo kuluntu," kutsho Mqamelo.
AmaSebe ahlukeneyo karhulumente adibanise iintloko ngelizama ukukhangela iindlela zokunceda amaxhoba ezi zandyondyo.
Related Topics: