Ngethuba uMongameli waseBrazil uLuiz Inacio Lula da Silva wayenikezela ngokusesikweni ubunkokheli beG20 kuMongameli woMzantsi Afrika uCyril Ramaphosa.
Enye yeentlanganiso ezibalulekileyo zeG20 iza kubanjelwa eGqeberha, eMpuma Koloni, ngomhla weshumi elinesibhozo ukuya kumhla wamashumi amabini kule nyanga.
IG20 iqhuba uchungechunge lweentlanganiso kweli loMzantsi Afrika kwimikhakha eyahlukeneyo yentlalo nezoshishino ngelilungiselela inkomfa yeG20 eza kuqhutywa kweli loMzantsi Afrika.
IG20 ngumbutho oyindibanisela yamazwe angamashumi amabini aphambili kwihlabathi ngeenjongo zokukhulisana kwezoqoqosho.
Ekupheleni konyaka ophelileyo, uMzantsi Afrika unikwe iwonga lokuba wongamele lo mbutho kunyaka ka2025, uthatha olu xanduva kwilizwe laseBrazil.
Amazwe angamalungu aphambili kwiG20 aquka iArgentina, Brazil, Australia, Canada, China, France, Germany, India, Japan, namanye amazwe. Kunyaka ophelileyo, iG20 ibigxile ngokukodwa kwingxaki yokulwa indlala, ukuguqulwa kwendlela ekuveliswa ngayo umbane nokuphuhliswa koqoqosho.
IG20 ayinazo iiofisi zikandlunkulu njengeminye imibutho emikhulu ehlabathini, koko ihlala kulo ndawo inikwe igunya lokongamela ngelo xesha.
Imibutho efana nezizwe ezimanyeneyo kwakunye neAfrican Union ngamalungu azimeleyo kwiG20. UNobhala Jikelele kwizizwe ezimanyeneyo uAntonio Guterres ebekutyelelo kweli ekuqaleni kwalo nyaka ngelize kuqwalasela amalungiselelo wale nkomfa izayo.
Le nkomfa yeG20 kulindeleke ukuba ingenise ngokucacileyo kwezoqoqosho leli nanjengoko kukho abatyeleli nabezoshishino abaza kuba nomdla wokuza kuzibonela iinkqubo zeG20 eMzantsi Afrika. Kulindeleke ukuba le nkomfa iqhutyelwe eBoardwalk eGqeberha iintsuku ezine.
USodolophu waseNelson Mandela Bay uBabalwa Lobishe uvakalise uchulumanco leli nyathelo eliza kunceda ukubuyisa isidima sedolophu yaseGqeberha.
“SinguMzantsi Afrika simanyene sibhiyozela eli nyathelo libaluleke kangaka, uMzantsi Afrika lilizwe lokuqala ukusingatha inkomfa yeG20 kweli lizwekazi laseAfrika,” utshilo uLobishe.
Related Topics: