Kubulewe obefunwa ngamapolisa kutshintshiselwana ngeembumbulu
Umrhanelwa oneminyaka engamashumi amahlanu ubudala nokwayanyaniswa nezenzo zolwaphulomthetho ezininzi, eziquka ukubulala, ukuqhekeza izindlu, nokukhuthuza kuxhotyiwe, ubulewe ngethuba edubulana namapolisa eGcuwa.
NgoLwesibini wale veki, amalungu ecandelo lobuntlola bolwaphulomthetho eGcuwa ebelandela ngenkuthalo ulwazi malunga nalo mrhanelwa.
Isithethi samapolisa uLieutenant Colonel Siphokazi Mawisa uthi umrhanelwa uye walandelwa emva kokubonwa ekhwela iteksi.
“Umrhanelwa ubhaqwe ekhwela iteksi kumzila waseMsobomvu esingisa eBika, la malungu abize uncedo kwisikhululo samapolisa aseMsobomvu. Amalungu eDetective and Visible Policing aphendule ngokukhawuleza, elandela iteksi de yamisa ukukothula abakhweli kwilokishi yaseCuba, eGcuwa,” utshilo uMawisa.
Ingxelo ithi amapolisa asebenzisa ubuchule ukubamba umrhanelwa, waphuma kwiteksi exhobe ngompu wathulula ngeembumbulu kumapolisa.
La malungu aziphindezele, adubula abulala umrhanelwa kwindawo yexhwayelo.
Kufunyenwe umpu wohlobo lwe9mm kumrhanelwa obhubhileyo.