I-AWCA ivule iofisi entsha eMpuma Koloni
Kutshanje iAWCA ivule iofisi yayo entsha eGqeberha. UMFANEKISO: UTHUNYELWE
Umbutho wabaphicothi beencwadi (Chartered Accountants/CAs) abangamanina abantsundu, iAfrican Women Chartered Accountants (AWCA), uvule iofisi eMpuma Koloni, lo msitho wokuvula ububanjwe ngoLwesine, umhla we12 kweyeDwarha 2024, kwihotele iRadisson Blu eGqeberha.
Ukuvulwa kwale ofisi kukwabethelele iinzame zalo mbutho zokuxhobisa abasetyhini abantsundu kwicandelo lezemali nelokubala.
Olu lwandiso lombutho lujolise ekuboneleleni ngengcebiso, uphuhliso lobungcali, kunye namathuba obunkokeli kumanina antsundu kwiphondo liphela, ngelixa ujongana neemfuno ezibaluleke kakhulu kubaphicothi beencwadi kwingingqi.
UMongameli weAWCA okwayinzalelwane yaseMpuma Koloni, uBuhle Hanise, kumsitho wokuvula ubethelele ukubaluleka kweli phulo.
“Iphondo leMpuma Koloni liphondo elityebileyo ngesakhono, kodwa likwajongene nemiceli mngeni eyodwa ethintela uphuhliso lolutsha olusanqwenela ukuba ziiCA (Chartered Accountants).
“Ngokuvula iofisi yeAWCA apha, sijolise ekuboneleleni ngenkxaso eyimfuneko ukuze soyise le miqobo kunye nokudala amathuba apho abasetyhini banokuphumelela kwaye bakhokele kwicandelo lezemali. Oku akukho malunga nokubalwa kwemali kuphela, kumalunga nokuguqula uluntu nokwakha ilifa lezizukulwana ezizayo,” utshilo uHanise.
Ethetha ngokubaluleka kwale ofisi intsha, uMlawuli weSouth African Institute of Chartered Accountants (SAICA), uPatricia Stock, uthe ukusekwa kweofisi yeAWCA eMpuma Koloni kufike ngexesha elinzima nanjengoko ingabafundi bezifundo zeCA abalishumi elinesine ekhulwini (14%) kuphela abaphumelele iimviwo zabo kuzwelonke.
“Ukusekwa kwale ofisi linyathelo eliya phambili lenguqu ekuqinisekiseni ukuba umsebenzi womphicothi zincwadi unabantu abohlukeneyo nokuqinisekisa ukuba amanina asuka kulo mmandla anikwa amathuba alinganayo ukuze aphumelele.
“I-SAICA kudala izibophelele ekudaleni amathuba abantu ababevinjwe amathuba ngaphambili, kwaye ukusebenzisana kwethu neAWCA bubungqina obunamandla baloo mbono. Ngokusebenzisana, sibeka isiseko sekamva kumsebenzi wokuphicotha iincwadi ongavaleli mntu ngaphandle, olinganayo, nomelayo,” utshilo uStock.
Kuthiwa iofisi entsha yaseMpuma Koloni iza kusebenza njengombindi wamaphulo enguqu eAWCA, aquka iinkqubo zokufundisa ngezimali, iindibano zoqeqesho kwezoshishino, kunye neendibano zocweyo zophuhliso lobunkokeli.
Ngale nzame, iAWCA ifuna ukuvala umsantsa ngokwesini kwicandelo lophicotho zincwadi elilawulwa ngamadoda, kwaye liqinisekise ukuba abasetyhini banenkxaso abayidingayo ukukhokela eli khondo kwixesha elizayo.