UJohn Hlophe urhoxile kwiJSC
UJohn Hlophe urhoxile kwiJSC. UMFANEKISO: Armand Hough / Independent Newspapers
Inkokeli yasepalamente yombutho woMkhonto weSizwe (MK Party) uGqirha John Hlophe, urhoxile ngokusesikweni kwiKhomishini yeNkonzo yezoBulungisa (JSC). Esi sigqibo silandela isithintelo sethutyana sakutshanje seNkundla ePhakamileyo yaseNtshona Koloni, esithintele uHlophe ekubeni athathe inxaxheba kudliwano-ndlebe oluqhubekayo lweJSC lokuvala izithuba zeNkundla eziPhakamileyo zoMzantsi Afrika.
Esi sigqibo senkundla siphume kwisicelo esifakwe yiDemocratic Alliance (DA), Freedom Under Law neCorruption Watch besithi uHlophe akanakusebenza kwakwiqumrhu elaphakamisa ukubekwa kwakhe ityala njengoMongameli weJaji ekuqaleni kwalo nyaka.
Isithethi sombutho iMK Party, uNhlamulo Ndhlela, ukungqinile ukuba umbutho weMK Party ubhalele ngokusesikweni uSomlomo weNdlu yoWiso-mthetho ukurhoxisa ukutyunjwa kukaHlophe.
“Umbutho weMK Party awuzukuvumela igama likaGqirha uJohn Hlophe ukuba lidityaniswe okanye lisetyenziswe ukugunyazisa iJSC elahlekisayo, enobuqhetseba, nequlunqwe ngendlela engafanelekanga,” utshilo uNdhlela kwingxelo.
UNdhlela ukwathe iJSC ayiphumelelanga ukuhlangabezana nomgangatho omiselweyo wamalungu amathathu avela kwimibutho ephikisayo.
I-JSC iqalise udliwano-ndlebe lokuvala izithuba zeNkundla eziPhakamileyo zoMzantsi Afrika ngoMvulo we7 kweyeDwarha kwaye oku kulindeleke ukuba kuthathe iintsuku ezisibhozo.